’سیکسی‘ شو کرانے والوں کو کوڑے پڑنے چاہییں، سری لنکن صدر

سری سینا نے عوامی خطاب کے دوران کہا کہ 20 دسمبر کو سری لنکا کے دارالحکومت کولمبو میں منعقد ہونے والے کنسرٹ کے دوران لوگوں نے خوشی سے سرشار مقامی خواتین کو اسٹیج پر چڑھتے ’ہیرو‘ سنگر کو بوسے دیتے اور اس سے بغلگیر ہوتے دیکھا جبکہ دیگر خواتین نے اس پر اپنے زیر جامے پھینکے۔ سری لنکن صدر کے مطابق، ’’یہ انتہائی غیر مذہب رویہ ہے جو ہماری ثقافت کے خلاف ہے۔‘‘

سری لنکن صدر کا مزید کہنا تھا، ’’میں اس بات کے حق میں تو نہیں کہ ان غیر مہذب خواتین کو زہریلی اسٹنگ رے کی دم سے کوڑے مارے جائیں جنہوں نے اپنے بریزیئرز اتارے، لیکن جن لوگوں نے اس طرح کا ایونٹ ترتیب دیا انہیں ضرور لگنے چاہییں۔‘‘

سری لنکا کی قدیم تاریخ میں مچھلی کی ایک خاص قسم اسٹنگ رے کی دُم سے کوڑے مارنا سخت جان مجرموں کے لیے مخصوص تھا۔ تاہم اب سری لنکا میں اسے کسی غلط کام کے لیے سزا دینے کے لیے بطور محاورہ استعمال کیا جاتا ہے۔

خبر رساں ادارے اے ایف پی کے مطابق ابھی تک معروف لاطینی پاپ اسٹار انریکے اگلیزیاس Enrique Iglesias کا کنسرٹ کرانے والی مقامی کمپنی کی طرف سے کوئی ردعمل سامنے نہیں آیا۔ لائیو ایونٹس نامی اس کمپنی کے مالکان میں معروف کرکٹ اسٹارز کمار سنگاکارا اور مہیلا جے وردھنے شامل ہیں۔

سری لنکا کے قدامت پسند معاشرے میں سر عام محبت کا اظہار کرنا یہاں تک کہ شادی شدہ جوڑوں کی طرف سے بھی، قابل قبول نہیں سمجھا جاتا۔ پولیس عام طور پر ایسے جوڑوں کو گرفتار کر لیتی ہے جو عوامی پارکوں یا ساحل سمندر پر بوس وکنار کرتے پائیں جائیں۔

کولمبو میں ہونے والا کنسرٹ انریکے اگلیزیاس کے ورلڈ ٹوور ’لوو اینڈ سیکس‘ کا حصہ تھا۔ لاطینی پاپ اسٹار کا یہ کنسرٹ رگبی اسٹیڈیم میں کرایا گیا تھا اور اس کے لیے شائقین نے پانچ ہزار سری لنکن روپوں سے لے کر 50 ہزار روپے تک خرچ کیے تھے جو 350 امریکی ڈالرز کے برابر رقم بنتی ہے۔