شامی شہر دوما میں اقوام متحدہ کی سکیورٹی ٹیم پر فائرنگ

مشرقی غوطہ کے دوما نامی شہر میں اقوام متحدہ کی سکیورٹی ٹیم پر حفاظتی صورتحال کے جائزے کے دوران فائرنگ کی گئی ہے ۔ تاہم اقوام متحدہ کے اہلکار نے نیوز ایجنسی اے ایف پی کو بتایا کہ اس واقع میں کوئی شخص زخمی یا ہلاک نہیں ہوا اور سکیورٹی  ٹیم کو واپس دمشق منتقل کر دیا گیا ہے۔

رواں ماہ کی سات تاریخ کو دوما کے عام شہریوں پر زہریلی گیس کے مبینہ حملے میں چالیس سے زیادہ افراد ہلاک ہوئے تھے۔ مغربی طاقتوں کی جانب سے شامی صدر بشار الاسد کی حکومت پر اس مبینہ حملے کا الزام عائد کیا گیا تھا۔

شام، امریکی فورسز دوبارہ حملے کے لیے ’ہردم تیار‘ ہیں، ٹرمپ

فائرنگ کا یہ واقعہ اس وقت پیش آیا جب کیمیائی ہتھیاروں پر نظر رکھنے والی بین الاقوامی تنظیم ’او پی سی ڈبلیو‘ کے ماہرین کی ٹیم حملے کی چھان بین کے سلسلے میں سکیورٹی ٹیم کی جانب سے اجازت کا انتظار کر رہی تھیں۔ تاہم اب ممکن ہے کہ ’او پی سی ڈبلیو‘ کے بین الاقوامی ماہرین فی الوقت دمشق میں موجود رہیں۔

بین الاقوامی ماہرین کی ٹیم شامی دارالحکومت دمشق میں ہفتے کے روز پہنچی تھی۔ تاہم اسی روز برطانیہ، فرانس اور امریکا کی جانب سے شام ميں مخصوص اہداف پر فضائی کارروائی بھی کی گئی تھی۔

ٹرمپ کا شام میں ممکنہ عسکری کارروائی کا عندیہ، روس کی تنبیہ

شام میں زہریلی گیس استعمال ہوئی، مگر ذمہ دار کون؟

جدید اور اسمارٹ میزائل آ رہے ہیں، روس تیار رہے، ٹرمپ

قبل ازیں اقوام متحدہ میں تعینات شامی سفیر بشار جعفری نے بروز منگل سکیورٹی کونسل کو آگاہ کیا تھا کہ اقوام متحدہ کی سکیورٹی ٹیم کی اجازت کے بعد ’او پی سی ڈبلیو‘ کے ماہرین اپنی تحقیقات کا آغاز کرسکتے ہیں۔

 

تاہم شامی سفیر نے اس بات پر بھی زور ديا تھا کہ شامی حکومت نے بھرپور تعاون کرنے کی کوشش کی ہے۔ لہٰذا اب یہ اقوام متحدہ کا فیصلہ ہے کہ موجودہ سکیورٹی حالات کے پیشِ نظر ’او پی سی ڈبلیو‘ کے ماہرین کو دوما میں تعینات کیا جائے۔

ع آ۔ ع س۔ (اے ایف پی)