شریعت ملکی قوانین کا منبع، لیبیا کی پارلیمان متفق

مغربی دفاعی اتحاد نیٹو کی حمایت سے لیبیا کے سابق حکمران معمر قذافی کی حکومت کے خلاف تحریک اور اس کے نتیجے میں کئی دہائیوں سے جاری قذافی حکومت کے خاتمے کو اب دو برس سے زائد عرصہ گزر چکا ہے۔ تاہم ابھی تک عبوری حکومت نہ تو وہاں امن و استحکام قائم کر سکی ہے اور نہ ہی نیا آئین تیار کیا جا سکا ہے۔ دوسری طرف ملکی سکیورٹی فورسز عسکریت پسندوں اور سابق باغیوں کی طاقت کو محدود کرنے کی کوششوں میں ہیں۔

لیبیا کی پارلیمان جنرل نیشنل کانگریس کی جانب سے جاری کردہ بیان کے مطابق اسمبلی نے اس بات پر اتفاق کیا ہے کہ اسلامی شریعت تمام تر قانون سازی کی بنیاد ہو گی اور ایک خصوصی کمیٹی تمام موجودہ قوانین کا جائزہ لے گی کہ یہ شریعت کے مطابق ہیں ہیں یا نہیں۔

کانگریس کی طرف سے یہ بیان ایک 60 رکنی پارلیمانی کمیٹی کے قیام سے کچھ وقت پہلے سامنے آیا جس کی ذمہ داری نئے آئین کا ڈرافٹ تیار کرنا ہے۔

لیبیا پہلے سے ہی ایک اسلامی ملک ہے اس لیے ابھی تک یہ تو پوری طرح واضح نہیں ہے کہ اس تازہ فیصلے کے کیا اثرات مرتب ہوں گے تاہم ماہرین کے مطابق اس سے فوجداری اور معاشی حوالے سے بننے والے قوانین ضرور متاثر ہوں گے۔ لیبیا کی ’نیشنل فورسز الائنس‘ پارٹی کے ابراہیم الغریانی Ibrahim al-Gharyani کے مطابق: ’’قانونی نظام میں ایسے زیادہ قوانین نہیں ہیں جو اسلامی قانون سے متصادم ہوں، اس لیے یہ کہنا آسان ہے کہ تمام تر قانون سازی کی بنیاد صرف شریعت ہو گی۔‘‘

خبر رساں ادارے روئٹرز کے مطابق لیبیا کے قانون سازوں کے خیال میں جنرل نیشنل کانگریس کی طرف سے اس بیان کا مقصد کسی نہ کسی حد تک سیاسی فائدہ حاصل کرنا ہے۔

شدت پسند گروپ انصار الشریعہ کی طرف سے اپنا اثر ورسوخ بڑھانے کی کوششوں کے دوران پارلیمان کے بعض ارکان پر یہ الزام بھی عائد کیا جاتا رہا ہے کہ وہ غیر اسلامی ہیں۔ اس گروپ کو 2012ء میں بن غازی میں امریکی سفارت خانے پر حملے کا ذمہ دار قرار دیا جاتا ہے۔ اس گروپ کے مسلح ارکان کی ملک کے مشرقی حصے میں فوج کے ساتھ جھڑپیں بھی ہوتی رہی ہیں۔

اخوان المسلمون کی جماعت جسٹس اینڈ کنسٹرکشن پارٹی (JCP) کے محمد الزروق Mohammed al-Zaroug کے مطابق: ’’اس بیان سے اس شخص پر یہ بات واضح ہو جائے گی جو یہ کہنا ہے کہ جنرل نیشنل کونسل شریعت کے قوانین کے مطابق کام نہیں کر رہی۔‘‘

تیونس اور مصر کی طرح جہاں طویل عرصے حکمران آمریت پسندوں کو عرب اسپرنگ کہلانے والی تحریک کے نتیجے میں اقتدار سے الگ ہونا پڑا تھا، لیبیا میں بھی جمہوریت میں اسلام کے کردار کے حوالے سے شدید بحث جاری ہے۔ اس بحث کی ایک وجہ ان بنیاد پرست مسلم گروپس کا طاقت حاصل کرنا ہے جنہیں قذافی نے طویل عرصے تک دبا کر رکھا تھا۔