شمالی غزہ پر اسرائیلی حملے جاری، کم ازکم سترہ فلسطینی ہلاک

غزہ میں حماس کے زیر انتظام محکمہ شہری دفاع کے مطابق اسرائیلی فوج کی جانب سے آج 18 نومبر بروز پیر شمالی غزہ میں واقع شہر بیت لاہیہ میں ایک گھر پر میزائل حملے میں خواتین اور بچوں سمیت کم از کم 17 افراد ہلاک ہو گئے۔

بتایا گیا ہے کہ اس حملے میں دو میزائل فائر کیے گئے تھے، جس کے بعد حملے کا نشانہ بننے والے گھر کی عمارت مکمل طور پر تباہ ہو گئی۔ ابھی تک ان معلومات کی آزادانہ طور پر تصدیق نہیں ہوسکی اور اسرائیلی فوج نے بھی اس واقعے پر تاحال کوئی تبصرہ نہیں کیا۔

اس سے قبل اتوار کو بیت لاہیہ میں ایک پانچ منزلہ رہائشی عمارت پر اسرائیلی فضائی حملے میں 72 افراد کے مارے جانے کی اطلاع تھی۔ یہ دعویٰ بھی غیر مصدقہ ہے جبکہ اسرائیلی فوج کی جانب سے اس پر بھی کوئی ردعمل سامنے نہیں آیا۔

غزہ کے لیے کوئی پلان بی نہیں، لازارینی

غزہ میں اقوام متحدہ کی فلسطینیوں کے لیے امدادی ایجنسی (یو این آر ڈبلیو اے) کے سربراہ فیلیپے لازارینی نے کہا ہے کہ  غزہ پٹی میں ان کے ادارے کے کام کا واحد متبادل اسرائیل کو وہاں خدمات کی فراہمی کی اجازت دینا ہے۔ یہ بات انہوں نے   پیر کے روز نامہ نگاروں سے بات چیت کے دوران کہی۔ انہوں نے دنیا بھر کے ممالک سے اس تنظیم پر اسرائیلی پابندی کے خلاف مزاحمت کرنے کے اپنے مطالبے کو بھی دہرایا۔ فیلیپے لازارینی اپنی تنظیم کے عطیہ دہندگان کے ساتھ حکمت عملی سے متعلق ایک اجلاس میں شرکت کے لیے جینیوا میں ہیں۔

اسرائیل کی جانب سے گزشتہ ماہ یو این آر ڈبلیو اے کے کام کرنے پر پابندی عائد کر دی گئی تھی، جسے لازارینی نے اس ایجنسی کی تاریخ کے سیاہ ترین لمحات میں سے ایک قرار دیا تھا۔ انہوں نے نامہ نگاروں سے بات چیت کرتے ہوئے کہا، ''میں نے رکن ممالک کی توجہ مبذول کرائی ہے کہ اب گھڑی ٹک  ٹک کر رہی ہے، ہمیں اسرائیلی پارلیمان کی جانب سے یو این آر ڈبلیو اے پر پابندی کے  بل پر عمل درآمد کو رکوانا ہوگا۔ انہوں نے صحافیوں کو بتایا کہ  غزہ میں اس ایجنسی کی خدمات کا اس کے سوا اور کوئی متبادل نہیں کہ اسرائیل اس کے آپریشن اپنے ہاتھ میں لے لے۔

لبنان میں بھی لڑائی جاری

لبنان میں ایرانی حمایت یافتہ حزب اللہ ملیشیا نے کہا ہے کہ اس کے جنگجوؤں نے پیر کے روز جنوب میں واقع قصبے خیام میں اسرائیلی فوجیوں پر چار حملے کیے۔  ایک روز قبل اس ملیشیا نے اسی علاقے میں اسرائیلی فوجیوں پر کم از کم سات حملوں کی اطلاع دی تھی۔

اسی دوران لبنان کے مقامی میڈیا نے اسرائیلی فوج کی طرف سے مختلف علاقوں پر نئے فضائی اور توپ خانے سے زمینی حملوں کی اطلاع دی ہے۔ غزہ کی جنگ کے متوازی لبنان میں جاری لڑائی نے بھی اس ملک میں انسانی صورت حال کو ڈرامائی طور پر ابتر کر دیا ہے۔

لبنانی حکومت کے سرکاری اعداد و شمار کے مطابق اسرائیل اور حزب اللہ کے مابین لڑائی میں اب تک لبنان میں  3,400 سے زائد افراد ہلاک اور 14,700 سے زائد زخمی ہو چکے ہیں۔ اسرائیلی فضائیہ گزشتہ ایک ہفتے سے جنوبی بیروت کے مضافات میں حزب اللہ کے گڑھ سمجھے جانے والے علاقوں کو مسلسل نشانہ بنا رہی ہے۔

اسی دوران اتوار کے روز وسطی لبنان میں کیے گئے ایک اسرائیلی حملے میں حزب اللہ کے ذرائع ابلاغ کے شعبے کے سربراہ اور مرکزی ترجمان محمد عفیف مارے گئے تھے۔

ش ر/ک م، م م (ڈی پی اے، روئٹرز)