’طالبان اپنی طرح اپنے بچوں کو تعیلم سے محروم نہ رکھیں‘

افغان صدر نے یہ بیان اساتذہ کے قومی دن کے موقع پر منعقد ہونے والی ایک تقریب میں دیا۔ انہوں نے کہا،" ہم حکومت مخالف مسلح گروپوں سے اپیل کرتے ہیں کہ جس طرح انہوں نے خود کو تعلیم کی دولت سے محروم کر رکھا ہے اُسی محرومی کا شکار اپنے بچوں اور اپنی آئندہ نسل کو نہ ہونے دیں"۔ اشرف غنی کا مزید کہنا تھا،" آئیے ہم سب ہاتھوں میں ہاتھ دے کر ملک میں امن و استحکام کو ممکن بنائیں کیونکہ امن کے بغیر ملکی استحکام نا ممکن ہے"۔

اشرف غنی جنہوں نے افغانستان کے نئے صدر کی حیثیت سے 30 ستمبر کو حلف اُٹھایا تھا، نے مزید کہا ہے کہ وہ اپنی مہم کو دوران افغانستان میں تعیلم کے نظام کو بہتر بنانے کا وعدہ کر چُکے ہیں اور وہ اپنے عہد کو پورا کرتے ہوئے اپنے پانچ سالہ دور صدارت کے دوران ملک میں اسکول کی سطح کی تعلیم کو معیاری بنانے کے لیے ممکنہ اقدامات کریں گے۔

افغانستان میں آج 15 اکتوبر کو اساتذہ کا قومی دن منایا جاتا ہے۔ اس دن کی مناسبت سے نئے افغان صدر نے اپنے ملک کو درپیش گوناگوں مسائل میں سے ایک کلیدی اہمیت کے حامل مسئلے یعنی ’افغانستان میں تعلیم کی ابتر صورتحال‘ کو بہتر بنانے کے لیے اپنی عزم مسمم کا اظہار بھی کیا ہے۔

اشرف غنی نے آئندہ چھ ماہ کے اندر اساتذہ کی تنخواہوں میں اضافے اور اُنہیں زمین کے پلاٹ دینے کا وعدہ بھی کیا۔ افغان صدر نے پاکستانی ٹین ایجر ملالہ یوسفزئی کو گزشتہ ہفتے امن کا نوبل انعام پانے کی مبارکباد بھی دی۔ ملالہ یوسفزئی کو یہ انعام خاص طور سے لڑکیوں کی تعیلم کے لیے اُن کی مہم کے عوض دیا گیا ہے۔ ملالہ کی عمر اس وقت 17 برس ہے۔

ملالہ نو اکتوبر 2012ء کو پاکستان کی وادئ سوات میں طالبان کے ایک حملے میں شدید زخمی ہو گئی تھیں۔ ایک گولی ان کے چہرے پر بھی لگی تھی۔ بعد ازاں انہیں برطانیہ بھیج دیا گیا تھا جہاں وہ برمنگھم کے ایک ہسپتال میں زیر علاج رہیں۔ اب وہ اسی شہر میں تعلیم حاصل کر رہی ہیں۔ ساتھ ہی وہ دنیا بھر میں بچوں بالخصوص لڑکیوں کے تعلیم کے حق کی علامت بھی بن چکی ہیں۔

انہیں انسانی حقوق کے لیے یورپی یونین کے اعلیٰ اعزاز سخاروف پرائز سمیت متعدد عالمی ایوارڈ دیے جا چکے ہیں۔ خیال رہے کہ سخاروف انسانی حقوق کے لیے یورپ کا اعلیٰ انعام تصور کیا جاتا ہے۔ قبل ازیں یہ ایوارڈ حاصل کرنے والوں میں نوبل امن انعام جیتنے والی میانمار کی آنگ سان سوچی اور جنوبی افریقہ کے سابق صدر نیلسن منڈیلا بھی شامل ہیں۔ یہ پرائز 1988ء سے ہر سال دیا جاتا ہے۔

ملالہ کو گزشتہ برس کے نوبل امن انعام کے لیے بھی نامزد کیا گیا تھا تاہم نوبل کمیٹی نے یہ انعام دنیا بھر سے کیمیائی ہتھیاروں کے خاتمے کے لیے کوشاں تنظیم کو دینے کا فیصلہ کیا تھا۔