عمران خان کی بھارت کو مذاکرات کی پیشکش

پاکستانی دارالحکومت اسلام آباد سے منگل اکیس اگست کو ملنے والی نیوز ایجنسی ایسوسی ایٹڈ پریس کی رپورٹوں کے مطابق اپنی اس پیشکش میں پاکستان تحریک انصاف کے رہنما اور نئے ملکی وزیر اعظم عمران خان نے جنوبی ایشیا کی ان دونوں روایتی حریف لیکن مسلمہ ایٹمی طاقتوں کے مابین کشمیر کے دیرینہ تنازعے سمیت تمام حل طلب امور کے تصفیے کی خاطر بات چیت کی تجویز دی ہے۔

صرف دو روز قبل وزیر اعظم کے طور پر حلف اٹھانے والے عمران خان نے منگل کو ٹوئٹر پر اپنے ایک پیغام میں کہا کہ پاکستان اور بھارت دونوں کو ہی آگے بڑھنے اور اپنے اپنے ہاں غربت کے خاتمے کی خاطر سبھی دو طرفہ اختلافات ختم کرنے کے لیے مکالمت کا راستہ اپنانا چاہیے۔

ایسوسی ایٹڈ پریس نے لکھا ہے کہ عمران خان نے یہ تجویز بھی دی کہ دونوں ہمسایہ ریاستیں باہمی تنازعات کے حل کے لیے یہ راستہ بھی اپنا سکتی ہین کہ نئی دہلی اور اسلام آباد کے مابین تجارتی معاہدے طے کیے جائیں۔

پاکستان کے نئے وزیر اعظم نے ٹوئٹر پر یہ بات بھارتی ہم منصب نریندر مودی کے اس حالیہ پیغام کے بعد کہی، جس میں ہندو قوم پرست سیاسی جماعت بھارتیہ جنتا پارٹی سے تعلق رکھنے والے مودی نے عمران خان کو وزیر اعظم بننے پر مبارک باد دی تھی اور ساتھ ہی پاک بھارت مذاکرات کی خواہش کا اظہار بھی کیا تھا۔

م م / ا ا / اے پی