فرانس: ’باستی ڈے‘ کی خصوصی پریڈ، اولانڈ کا انٹرویو

پانچ سال کے وقفے کے بعد منعقد ہونے والی اس شاندار خصوصی پریڈ میں تقریباً پانچ ہزار فوجی، سینکڑوں گھوڑے اور فوجی گاڑیاں جبکہ درجنوں جنگی طیارے اور ہیلی کاپٹر بھی شریک تھے۔ صدر اولانڈ ایک کھلی فوجی گاڑی میں سوار تھے اور کافی عرصے بعد اُن کی شریک حیات والیری ٹریئر وائلر بھی اُن کے ہمراہ تھیں۔ شانز ایلی زے کے دونوں طرف ہزارہا شہری اس پریڈ کو دیکھنے کے لیے جمع تھے۔

پریڈ کے بعد فرانس کے قومی دن کی مناسبت سے اولانڈ نے اپنے ایک خصوصی ٹیلی وژن انٹرویو میں مختلف اہم قومی اور بین الاقوامی امور پر اظہار خیال کیا۔ فرانس میں مختلف کاروباری اور صنعتی اداروں کی جانب سے بڑی تعداد میں ملازمتیں ختم کیے جانے کے سنگین مسئلے کے پس منظر میں اولانڈ نے اپنی اقتصادی پالیسیوں کا دفاع کیا۔

ابھی دو روز قبل فرانس کے موٹر گاڑیاں تیار کرنے و الے سب سے بڑے ادارے پی ایس اے Peugot نے روزگار کے آٹھ ہزار مواقع ختم کرنے کا اعلان کیا تھا۔ اولانڈ نے کہا کہ اس کمپنی کی جانب سے ملازمتیں ختم کرنے کا اعلان اور پیرس میں ایک کارخانے کو بند کرنے کا مجوزہ اقدام ’ناقابل قبول‘ ہے۔

اولانڈ نے کہا کہ ریاست اس بات کی اجازت نہیں دے گی اور اس موٹر ساز ادارے کے منصوبوں پر پھر سے بات چیت ہونی چاہیے۔ اولانڈ نے کمپنی پر الزام عائد کیا کہ اُن کے پیشرو نکولا سارکوزی کے دور حکومت میں یہ کمپنی جان بوجھ کر ملازمتوں کے خاتمے سے متعلق اپنے منصوبوں کو منظر عام پر نہیں لائی تھی۔

اُدھر Peugot کا ملازمتوں کے مواقع ختم کرنے کے اعلان کے دفاع میں یہ کہنا ہے کہ اقتصادی بحران کی لپیٹ میں آئے ہوئے یورپ میں کاروں کی طلب کم ہوتی جا رہی ہے اور فرانس میں پیداواری اخراجات بڑھ گئے ہیں۔ آج اپنے خصوصی ٹیلی وژن انٹرویو میں اولانڈ نے کمپنی کے اس جواز کو قبول کرنے سے انکار کر دیا۔

اولانڈ نے کہا کہ پیداواری اخراجات اور مزدوروں کی بھاری اجرتوں کو اس طرح کے منصوبوں کے لیے قصور وار ٹھہرانا آسان ہے تاہم ساتھ ہی اولانڈ نے یہ اعتراف کیا کہ فرانس کو ’مسابقت کے مسئلے‘ کا سامنا ہے۔ اولانڈ نے کہا کہ فرانس کے سماجی بہبود کے نظام کو جاری و ساری رکھنے کے لیے حکومت صرف مزدوروں سے لیے جانے والے ٹیکسوں پر انحصار کرنے کی بجائے اُن مالی وسائل سے بھی استفادہ کر سکتی ہے، جو ہر طرح کی آمدنی پر اور صارفین پر بھی ٹیکسوں سے حاصل کیے جاتے ہیں۔

اولانڈ نے پہلی مرتبہ کھلے عام اُس اسکینڈل پر بھی بات کی، جس نے اُن کی موجودہ شریک حیات ٹریئر وائلر کی جانب سے ٹوئٹر پر بھیجے جانے والے ایک پیغام سے جنم لیا تھا۔ ٹریئر وائلر نے پارلیمانی انتخابات کے دوران اپنے اس پیغام میں اولانڈ کی سابقہ شریک حیات اور اُن کے زیادہ تر بچوں کی ماں سیگولین رویال کے ایک سیاسی حریف کی حمایت کی تھی اور یہ پیغام اولانڈ کے لیے شدید خفت کا باعث بنا تھا۔

آج اپنے انٹرویو میں اولانڈ نے کہا:’’میرے خیال میں نجی معاملات نجی سطح پر ہی حل کیے جانے چاہییں۔‘‘ اولانڈ نے کہا کہ اُنہوں نے اپنے سبھی قریبی لوگوں سے یہ بات کہہ دی ہے کہ وہ اس اصول کا احترام کریں۔

aa/ab(dpa)