قندھار حملے اسامہ کی ہلاکت کا بدلہ لینے کی کوشش ہے، کرزئی

افغانستان کے شورش زدہ جنوبی صوبہ میں طالبان کی طرف سے حملوں کا آغاز آج ہفتے کی دوپہر سے ہوا اور شام تک شہر کے مختلف مقامات سے فائرنگ کی آوازیں سنائی دے رہی تھیں۔

افغان صدر حامد کرزئی کے دفتر سے جاری کیے جانے والے ایک تازہ بیان میں طالبان کی طرف سے ان حملوں کو اسامہ بن لادن کی ہلاکت کا بدلہ لینے کی ایک کوشش قرار دیا گیا ہے۔

طالبان عسکریت پسندوں کے ساتھ فائرنگ کے تبادلے میں کم از کم دو افراد ہلاک جبکہ 30 افرادکے زخمی ہونے کی اطلاعات ہیں۔ حملوں کے اس سلسلے کا آغاز قندھار شہر کے وسط میں واقع گورنر کے رہائشی اور دفتری کمپاؤنڈ پر دھماکے سے ہوا۔ جس کے بعد متعدد دیگر دھماکوں کی آوازیں سنی گئیں۔ خبر رساں ادارے روئٹرز کے مطابق شہر بھر میں کم از کم 10 دھماکے سنے گئے۔

دھماکے کے بعد فائرنگ کا سلسلہ شروع ہوگیا۔ روئٹرز نے اپنے نامہ نگار کے حوالے سے بتایا ہے کہ اس نے گورنر کے کمپاؤنڈ کے قریب واقع ایک پانچ منزلہ عمارت سے مسلح افراد کو گورنر کے دفتر کی طرف فائرنگ کرتے دیکھا، جس کا جواب گورنر کے سکیورٹی گارڈز کی طرف سے بھی دیا گیا۔

قندھار گورنر طور یلائی ویسا کے ترجمان زلمائی ایوبی کے مطابق حملے کے وقت گورنر مکان کے اندر موجود تھے اور ترجمان کے مطابق وہ بخیریت ہیں۔ طالبان نے اس حملے کی ذمہ داری قبول کرنے کا اعلان کیا ہے۔

طالبان کی طرف سے کہا گیا ہے کہ ان حملوں کا مقصد قندھار کا کنٹرول حاصل کرنا ہے۔ صوبہ قندھار کو طالبان کا گڑھ قرار دیا جاتا ہے۔ طالبان کے ایک ترجمان قاری یوسف احمدی کے بقول قندھار میں حکومتی دفاتر پر کیے جانے والے ان حملوں میں قریب ایک سو عسکریت پسند شریک ہیں، جن میں وہ گزشتہ ماہ جیل سے فرار ہونے والے بعض طالبان بھی شامل ہیں۔

رپورٹ: افسراعوان

ادارت: عابد حسین