لاہور میں فضائی آلودگی کی سطح قابل قبول حد سے 80 گنا زائد

ہفتے کے روز لاہور میں ہوا کے معیار کا انڈیکس عالمی ادارہ برائے صحت کی قابل قبول سطح سے ریکارڈ سے اسی گنا خراب دیکھا گیا۔ حکام کے مطابق یہ آج تک کی بدترین سطح ہے۔

بتایا گیا ہے کہ رات کے وقت آلودگی کے حوالے سے انتہائی خطرنات ذرات پی ایم ٹو پوائنٹ فائیو کی سطح ایک ہزار سڑسٹھ تھی، جو صبح کے وقت کم ہو کر تین سو پر آ گئی۔ عالمی ادارہ صحت کے مطابق اس انتہائی خطرناک ذرے کی دس سے زائد سطح صحت کے لیے نقصان دہ سمجھی جاتی ہے۔

لاہور شہر کی تحفظ ماحول کی ایجنسی سے وابستہ سینیئر اہلکار جہانگیر انور کے مطابق، ''ہم اس سے پہلے کبھی ایک ہزار کی سطح پر نہیں پہنچے تھے۔‘‘

حالیہ کچھ دنوں سے لاہور شہر سموگ اور دھند کے ساتھ ساتھ کم گریڈ کے ڈیزل جلائے جانے سے پیدا ہونے والے ذرات کی وجہ سے بری طرح متاثر ہوا ہے۔موسمی زرعی فضلے کے جلائے جانے اور ٹھنڈی ہوا کی وجہ سے سموگ پھیلنے کے واقعات لاہور کے لیے نئے نہیں ہیں۔

انور کے مطابق، ''ہوا کی کوالٹی کا انڈیکس اگلے تین سے چار روز تک خراب رہے گا۔‘‘

صوبائی تحفظ ماحول ایجنسی نے شہر میں تین مقامات کی نشاندہی کرتے ہوئے ''انہیں ہاٹ اسپاٹ‘‘ قرار دیا ہے اور ان کے حوالے سے پابندیاں نافذ کی ہیں۔ بتایا گیا ہےکہ شہر میں ٹو اسٹروک انجن والے رکشوں اور فلٹر کے بغیر بار بی کیو کرنے والے ریستورانوں پر پابندی عائد کر دی گئی ہے۔ پیر کے روز اسی تناظر میں حکومتی دفاتر اور پرائیویٹ کمپنیوں کا نصف عملہ گھر سے کام کرے گا۔

تعمیراتی کام روک دینے اور گلیوں میں ٹھیلے والوں کو بھی کام سے روک دیا گیا ہے جب کہ کھلی فضا میں کھانا پکانے والوں کو رات آٹح بجے کام بند کر دینے کی ہدایات جاری کی گئی ہیں۔

ع ت، ش ر (اے ایف پی)