لیبیا میں پرتشدد واقعات کا سلسلہ جاری

لیبیا کے وزیر انصاف صالح المرغانی کے مطابق جمعے کے روز حکومت مخالف ملیشیا کے خلاف مظاہرے کے دوران پھوٹ پڑنے والے پرتشدد واقعات میں تین درجن سے زائد ہلاکتوں کے علاوہ 450 افراد زخمی ہیں۔ وزیر انصاف کے مطابق دارالحکومت میں حکومت کی حامی اور مخالف ملیشیا کے درمیان گزشتہ رات بھی فائرنگ کا تبادلہ ہوتا رہا۔ اِس دوران ہفتے کی شام طرابلس کی مقامی انتظامیہ نے پرتشدد واقعات کے خلاف احتجاج کے طور پر پبلک اور پرائیویٹ سیکٹر میں تین روزہ ہڑتال کا اعلان کیا ہے۔ تین روزہ ہڑتال آج اتوار سے شروع ہو گی۔

ہفتے کی صبح میں طرابلس میں فوج کی بیرک پر مصراتا بریگیڈ نے حملہ کیا تھا۔ اِس حملے میں ایک فوجی کے ہلاک اور دیگر آٹھ کے زخمی ہونے کی تصدیق کر دی گئی ہے۔ لیبیا کی وزارت دفاع کے ایک نمائندے کرنل مصباح الحرنا کے مطابق مصراتا بریگیڈ نے فوجی بیرک سے اسلحہ لوٹنے کے بعد اُسے آگ لگادی اور وہاں کھڑی موٹر گاڑیاں ساتھ لے گئے۔ قذافی کے خلاف مسلح جدوجہد کے دوران مصراتا میں اُس وقت کی سرکاری فوج کے خلاف شہر کی مسلح قوت نے انتہائی پرجوش جنگ لڑی تھی۔ یہ جنگ وہ جیت گئے تھے۔ اب وہی مسلح گروپ طرابلس میں مقیم ہے۔ اسی گروپ کے مزید حامیوں نے ہفتے کے دن طرابلس میں داخل ہونے کی کوشش بھی کی لیکن و ناکام رہے۔ سردست اُن کو ایک مخالف ملیشیا نے شہر میں داخل ہونے سے روک دیا گیا۔

ہفتے کے روز سرکاری فورسز اور حکومت کی حامی ملیشیا نے اس فوجی اڈے کو چھڑانے کی کوشش شروع کی ہے، جس پر مسلح افراد نے قبضہ کر رکھا ہے۔ واضح رہے کہ چند روز قبل ہزاروں افراد نے طرابلس میں مظاہرہ کرتے ہوئے حکومت سے مطالبہ کیا تھا کہ وہ ملک سے غیرقانونی اسلحے کا خاتمہ کرے، تاہم ایک ملیشیا کے مسلح افراد نے ان مظاہرین پر فائرنگ کر کے متعدد افراد کو ہلاک کر دیا تھا اور تب سے طرابلس میں پرتشدد واقعات کا سلسلہ جاری ہے۔ تازہ جھڑپوں کی روشنی میں حکومت کی حامی ملیشیا نے مصراتا سے طرابلس میں داخلے کی مرکزی شاہراہ کو بھی بند کر دیا گیا ہے۔

وزیراعظم علی زیدان نے بھی متحارب گروپوں سے جھڑپوں کا سلسلہ فوری طور پر روک دینے اور صبر و تحمل اختیار کرنے کی اپیل کی ہے۔ علی زیدان کے مطابق اگلے کچھ گھنٹے لیبیا کی سالمیت کے لیے بہت اہم ہو سکتے ہیں۔ دوسری جانب امریکی وزیرخارجہ جان کیری نے لیبیا کے دارالحکومت طرابلس میں تازہ پرتشدد واقعات کی مذمت کی ہے۔ جان کیری نے ہفتے کے روز اپنے ایک بیان میں کہا کہ سن 2011 میں لیبیا کی عوام نے انقلاب یہ تشدد دیکھنے کے لیے برپا نہیں کیا تھا۔ لیبیا میں امریکی سفیر ڈیبرا جونز نے اپنے ٹویٹر پیغام میں لکھا کہ نہایت افسوس کی بات ہے کہ رات سے فائرنگ کا تبادلہ جاری ہے جو انقلاب کے شہیدوں کے وقار کے منافی ہے۔

واضح رہے کہ حکومت مخالف ملیشیا نے گزشتہ ماہ وزیراعظم علی زیدان کو کچھ گھنٹوں کے لیے اغوا کر کے پابند کر دیا تھا۔ ڈکٹیٹر معمر القذافی کے زوال کے بعد لیبیا میں مسلسل سیاسی عدم استحکام اور متحارب قبائلی گروہوں کی پرانی دشمنیوں کے باعث بدامنی دیکھی جا رہی ہے۔