لیبیا کی پارلیمنٹ نے احمد معيتيق کی حکومت کی توثیق کر دی

لیبیا کی پارلیمنٹ کے اجلاس میں صرف 93 اراکین موجود تھے اور اُن میں سے 83 نے احمد معيتيق کی حکومت کی منظوری دی۔ دیگر اراکین نے پارلیمنٹ کے سیشن کا بائیکاٹ کر رکھا تھا۔ موجود اراکین میں تقریباً سبھی اسلام پسند جماعتوں یا نظریے کے حامل تھے۔ بائیکاٹ کرنے والے اراکین نے پارلیمنٹ کے سیشن کو غیر قانونی قرار دیا اور وہ اس کی وجہ پارلیمنٹ کی مدت ختم ہونے کو قرار دیتے ہیں۔

اتوار کے روز پارلیمنٹ کا سیشن انتہائی سخت سکیورٹی میں منعقد ہوا۔ یہ اجلاس دارالحکومت طرابلس کے مشرق میں واقع ایک محل میں ہوا۔ پارلیمان کا اجلاس طرابلس کے ایک دوسرے مقام پر منعقد کرنے کی وجہ جنرل خلیفہ حفتر کی جانب سے اجلاس پر حملے کی دھمکی کے تناظر میں کیا گیا تھا۔ پارلیمنٹ کے اجلاس کے مخالفین میں جنرل خلیفہ حفتر بھی شامل ہیں اور یہ سبھی یکساں مؤقف کے حامل ہیں کہ پارلیمنٹ اپنی مقررہ مدت پوری کر چکی ہے اور اُس کے تمام فیصلے غیر قانونی اور دستور مخالف ہیں۔

لیبیا کی مرکزی حکومت کو کئی سکیورٹی چیلنجز کا سامنا ہے اور احمد معيتيق کی نئی حکومت سے بھی اس کی توقع کی جا رہی ہے کہ وہ شاید پیدا شدہ کشیدہ اور تناؤ سے بھرے سیاسی ماحول میں خوشگوا موڑ لا سکیں۔ مبصرین کے مطابق جنرل خلیفہ حفتر اور اسلام پسندوں کے درمیان ممکنہ جھڑپوں کو روکنا ہی احمد معيتيق کی حکومت کا سب سے بڑا چیلنج ہے۔ طرابلس کی عبوری حکومت پہلے ہی جنرل حفتر کے مسلح اقدامات کو بغاوت قرار دے چکی ہے۔ جنرل حفتر کے سیاسی و مسلح مؤقف کے حوالے سے نئی حکومت کے سربراہ احمد معيتيق کی جانب سے کوئی بیان سامنے نہیں آیا ہے۔

گزشتہ ہفتے کے دوران جنرل حفتر کے مسلح افراد نے پارلیمنٹ پر اُس وقت دھاوا بولا تھا جب نئی حکومت کے لیے ووٹ ڈالنے کا عمل شروع ہونے والا تھا۔ اتوار کے اجلاس میں بھی بعض اراکین نے پارلیمنٹ کا کورم مکمل نہ ہونے کی جانب اسپیکر نے توجہ دلائی لیکن اجلاس جاری رکھا گیا۔ لیبیا کی اسلام پسند سیاسی جماعت اخوان المسلمون کے رکن پارلیمنٹ محمد مَرغام کا کہنا تھا کہ بائیکاٹ کرنے والے جمہوریت کے راستے میں رکاوٹ کھڑی کرنے کی کوشش میں ہیں اور حفتر کے مسلح اقدامات مجرمانہ اقدامات ہیں اور ایسی دہشت گردی کے خلاف جنگ کی جائے گی۔

یہ امر اہم ہے کہ لیبیا کی موجودہ پارلیمنٹ رواں برس فروری میں اپنی مدت پوری کر چکی ہے۔ اس نکتے پر پارلیمنٹ منقسم ہے۔ پارلیمنٹ کے اوّل نائب اسپیکر عزالدین العوامی کا کہنا ہے کہ اتوار کے روز حکومت سازی کا عمل جمہوریت کی بےعزتی کے مساوی ہے اور اس کی وجہ سے سارے لیبیا کی سلامتی اور استحکام کو داؤ پر لگا دیا گیا ہے۔ العوامی کے مطابق تمام اقدامات پارلیمانی اصولوں کے منافی ہیں اور تمام اراکین کو ہفتے کی شب پیغام بھیجا گیا تھا کہ اجلاس میں شرکت غیرآئینی ہو گی لہٰذا شرکت سے اجتناب کیا جائے۔