مئی میں محمد بن سلمان پاکستان آئیں گے، اسحاق ڈار

اسلام آباد میں نامہ نگاروں سے بات چیت کے دوران وزیر خارجہ اسحاق ڈار نے بتایا، ’’سعودی ولی عہد کا یہ دورہ متوقع ہے، جو مئی کے دوران کسی بھی وقت ہوگا۔ ہمیں اس طرف(سعودی عرب) سے حتمی تاریخیں ملیں گی اور وزارت خارجہ ان سے سے رابطے میں ہے اور فی الحال ان کے دورے کا امکان ہے۔‘‘

پاکستان میں سرمایہ کاری کو ترجیح دیں گے، سعودی عرب

سعودی عرب کی پاکستان کو مزید سرمایہ کاری کی یقین دہانی

سعودی ولی عہد آخری بار فروری 2019ء میں سابق وزیراعظم عمران خان کی حکومت میں پاکستان کے دورے پر آئے تھے۔ اسحاق ڈار کے مطابق سعودی ولی عہد نے رمضان میں وزیراعظم شہباز شریف سے ملاقات کے دروان دورہ پاکستان کی دعوت قبول کی تھی۔

باہمی رابطوں میں اضافہ

حالیہ ہفتوں میں پاکستان اور سعودی عرب کے درمیان رابطوں میں اضافہ ہوا ہے اور دو اعلٰی سطح کے سعودی وفود پاکستان کا دورہ کر چکے ہیں جبکہ وزیراعظم شہباز شریف اور سعودی ولی عہد محمد بن سلمان کی دو ملاقاتیں ہو چکی ہیں۔ جبکہ گزشتہ ماہ ہی سعودی وزیر خارجہ فیصل بن فرحان بھی ایک اعلٰی سطح کے وفد کے ہمراہ پاکستان کا دورہ کر چکے ہیں۔

اب سعودی نائب وزیر دفاع پاکستان میں

سعودی وزیر خارجہ کا دورہ پاکستان اہم کیوں؟

اسحاق ڈار نے کہا کہ سعودی ولی عہد کی ہدایت پر دوطرفہ تجارت اور سرمایہ کاری کے ایجنڈے پر تیزی سے ہونے والی پیش رفت کی وجہ سے پاکستان کا مستقبل 'امید افزا‘ نظر آتا ہے۔

پاکستان اور سعودی عرب کے درمیان مضبوط تجارتی، دفاعی اور ثقافتی تعلقات ہیں۔ سعودی عرب میں 27 لاکھ سے زائد پاکستانی مقیم ہیں اور یہ پاکستان میں ترسیلات زر کا سب سے بڑا ذریعہ ہے۔

وزیراعظم شہباز شریف نے پیر کو کہا تھا کہ خصوصی سرمایہ کاری سہولت کونسل (ایس آئی ایف سی) کے ذریعے سعودی سرمایہ کاروں کو رکاوٹوں سے پاک کاروبار دوست ماحول فراہم کیا جائے گا۔ ان کا کہنا تھا کہ بہت جلد دونوں ملکوں کے درمیان اربوں ڈالر کے ٹھوس معاہدے ہوں گے۔

دریں اثنا امریکی محکمہ خارجہ کے ترجمان میتھیو ملر سے جب سعودی ولی عہد کے مجوزہ دورہ پاکستان سے متعلق سوال پوچھا گیا تو ان کا کہنا تھا کہ امریکہ ہمیشہ اپنے شراکت داروں کے درمیان سفارتی رابطوں کی حمایت کرتا ہے۔

میتھیوملر کا کہنا تھا، ''میرے پاس سعودی ولی عہد کے دورہ پاکستان پر مزید کوئی تبصرہ نہیں ہے، لیکن یہ ہے کہ اس قسم کی سفارتی مصروفیات معمول کی بات ہے اور جس کی ہم حمایت اور حوصلہ افزائی کرتے ہیں۔‘‘

ج ا/       (خبر رساں ادارے)