ماحولیاتی نقصان کے نتائج سے تجارتی فائدہ

چین سے یورپ آنے والے مال بردار بحری جہاز عام طور پر بحر ہند اور پھر نہر سوئز کا راستہ اختیار کرتے ہیں۔ قریب ڈیڑھ سو سال سے یہی رستہ مال بردار بحری جہازوں کے لیے مختصر ترین روٹ بنا ہوا ہے۔ اس راستے سے چین سے یورپ پہنچنے میں ایک کارگو شپ کو چھ سے سات ہفتے لگ جاتے ہیں۔

چینی جہاز راں کمپنی COSCO کا ایک مال بردار بحری جہاز ’یونگ شینگ‘ 15 اگست کو چین کے مرکزی تجارتی شہر شنگھائی کے نزدیک واقع بندرگاہی شہر تائی چانگ سے روانہ ہو چکا ہے۔ اس کی ہالینڈ میں روٹرڈیم کی بندرگاہ پر آمد 10 ستمبر کو متوقع ہے۔ یہ جہاز قریب چار ہفتوں میں اپنا سفر مکمل کر لے گا۔

بارہ روز کی بچت

آرکٹک اوقیانوس کے راستے چین سے یورپ کا یہ سمندری سفر روایتی روٹ کے مقابلے میں 12 دن کم وقت لیتا ہے۔ یعنی نہر سوئز والے راستے کے مقابلے میں اس طرح یورپ پہنچنے میں بارہ دن کم لگتے ہیں۔ اس کی وجہ ماحولیاتی تبدیلیوں کے نتائج ہیں، جن کے سبب شمال مشرقی چوٹی کا یہ علاقہ موسم گرما میں کوئی چار ماہ تک سفری راستہ فراہم کرتا ہے۔ سب سے پہلے 2009ء میں دو بحری جہاز اس شمال مشرقی راستے سے گزرے تھے جبکہ 2012ء میں 46 بحری جہازوں نے اس نئے راستے پر سفر کیا تھا۔ اب چین نے اپنا پہلا تجارتی بحری جہاز اس سمندری راستے سے یورپ کی طرف روانہ کیا ہے۔ یہ وہ بحری راستہ ہے جہاں سے گزرنا کبھی ممکن ہی نہیں تھا۔

چینی شپنگ کمپنی COSCO کے مینیجر کائی می یانگ کہتے ہیں، ’’مال بردار بحری جہازوں کے لیے یہ نہایت مفید ہے۔ ایک تو یہ روٹ کم وقت لیتا ہے، چھوٹا ہے، یہ راستہ اپنانے پر توانائی یا ایندھن بھی کہیں کم استعمال ہوتا ہے۔ اس کے علاوہ یہ راستہ محفوظ ہے۔ روایتی بحری راستہ خطرناک ہو چکا ہے۔ انڈونیشیا اور ملائیشیا کے درمیان سمندری علاقے میں بحری قزاقوں کا ڈر ہوتا ہے اور اسی طرح صومالیہ کے ساحلی علاقوں میں بھی قزاقوں کے حملے آئے دن ہوتے رہتے ہیں۔ اُدھر مصر کی صورتحال بھی فی الحال نہایت خطرناک ہے۔ نہر سوئز بھی محفوظ نہیں ہے اور تیزی سے بڑھتی ہوئی تیل کی قیمتیں بھی ایک بہت بڑا مسئلہ ہیں۔‘‘

جرمنی کے بندرگاہی شہر ہیمبرگ کے ایوان صنعت و تجارت سے منسلک تجارتی امور کے ماہر فلپ کوخ کا کہنا ہے کہ تاجروں کے لیے یہ ایک خوش آئند امر ہے کہ وہ کم لاگت کے ساتھ اور کم وقت میں اپنی برآمدی مصنوعات یورپ پہنچا سکتے ہیں۔ اس طرح تجارتی مصنوعات کی ترسیل کی بہتر منصوبہ بندی کی جا سکتی ہے۔ کوخ کے بقول، ’’یہ نیا روٹ تجارتی برادری کے لیے ایک نئی تحریک کا سبب بنے گا۔‘‘

آرکٹک اوقیانوس میں بڑھے ہوئے خطرات

کرہء ارض کے انتہائی شمال میں منجمد سمندری علاقوں میں برف پگھل رہی ہے۔ رواں سال ماسکو انتظامیہ کی اجازت سے روس کے شمالی ساحلوں کے ساتھ ساتھ بہت سے بحری جہاز کُل قریب 400 مرتبہ گزر چکے ہیں۔ اس رجحان میں اضافہ ہو رہا ہے۔ امریکی ماہر ماحولیات مارک سیرِیز نے خدشہ ظاہر کیا ہے کہ اگر قطب شمالی یا آرکٹک اوقیانوس کی آب و ہوا میں اسی طرح تبدیلی آتی رہی اور وہاں درجہء حرارت میں اضافہ ہوتا رہا تو 2030ء تک وہاں موجود ساری برف پگھل چکی ہو گی، یعنی ہو سکتا ہے کہ تب قطب شمالی پر سرے سے کوئی برف موجود ہی نہ ہو۔

مُو چی/ کشور مصطفیٰ

مقبول ملک