’مذہبی نسل کشی کے شیطان کو بند کیا جائے‘: انتونیو گوئتیرس

عالمی ادارے کی مہاجرین کے امور سے متعلق ایجنسی نے یہ انتباہ وسطی افریقی جمہوریہ کے وزیر خارجہ کی طرف سے اقوام متحدہ کی سکیورٹی کونسل سے ہنگامی بنیاد پر یو این امن فورس بھیجنے کی اپیل کے تناظر میں کیا ہے۔

سابقہ فرانسیسی نوآبادی، وسطی افریقی جمہوریہ میں ایک سال قبل اس ملک کے شمالی حصے سے تعلق رکھنے والے زیادہ تر مسلمان باغیوں کے اتحاد ’’سلیکا‘‘ کی طرف سے حکومت پر قبضے کے بعد سے اب تک ہزاروں افراد کی جانیں ضائع ہو چُکی ہیں۔

گزشتہ برس دسمبر میں حالات میں مزید کشیدگی اُس وقت پیدا ہوئی جب زیادہ تر مسیحی عقیدے سے تعلق رکھنے والوں پر مشتمل ملیشیا فورس ’’اینٹی بلاکا‘‘ یا بلاکا مخالف نے سلیکا اتحاد سے تعلق رکھنے والے باغیوں کے خلاف اپنی انتقامی کارروائی کو طور پر مسلمان آبادی پر بھی حملے شروع کر دیے۔ اقوام متحدہ کے کمشنر برائے مہاجرین انتونیو گوئتیرس نے گزشتہ روز یعنی جمعرات کو 15 رکنی اقوام متحدہ کی سلامتی کونسل کے ایک اجلاس سے خطاب میں کہا، ’’دسمبر کے آغاز سے ہم غربت اور بحران کی شکار وسطی افریقی جمہوریہ CAR میں مسلمان آبادی کی اکثریت کا مؤثر طریقے سے صفایا ہوتا دیکھ رہے ہیں۔‘‘

انہوں نے مزید کہا، ’’ہزاروں مسلمان یہ ملک چھوڑ چُکے ہیں، موجودہ بحرانوں میں یہ ہجرت کرنے والوں کا دوسرا بڑا بہاؤ ہے۔ جو مسلمان باشندے وسطی افریقی جمہوریہ میں رہ گئے ہیں انہیں مسلسل خطرات کا سامنا ہے۔‘‘

سلامتی کونسل اقوام متحدہ کی اُس تجویز پر غور و خوض کر رہی ہے جس میں اس ملک کو مزید تباہی سے بچانے کے لیے وہاں قریب 12 ہزار فوجیوں پر مشتمل ایک مضبوط امن فورس کی تعیناتی کی بات کی گئی ہے۔ اقوام متحدہ کے انسانی حقوق کے کمیشن کے ایک اعلیٰ عہدیدار کے بقول، ’’وسطی افریقی جمہوریہ میں نسلی اور مذبی بنیادوں پر نسل کشی کا عمل جاری ہے۔‘‘

اگر سلامتی کونسل نے تجویز منظور کر لی تو وسطی افریقی جمہوریہ میں اقوام متحدہ کی امن فورس موسم گرما کے اواخر تک کہیں فعال ہو سکے گی۔

اقوام متحدہ کے کمشنر برائے مہاجرین انتونیو گوئتیرس کے بقول، ’’محض گزشتہ ہفتے وسطی افریقی جمہوریہ کے 18 مغربی مقامات میں قریب 15 ہزار افراد کرسچین عقیدے سے تعلق رکھنے والوں پر مشتمل ملیشیا فورس ’’اینٹی بلاکا‘‘ کی طرف سے گھیر لیے گئے تھے اور انہیں حملوں کے شدید خطرات کا سامنا تھا۔‘‘ گوئیترس کے مطابق گزشتہ برس تک CAR میں مذہبی تنازعات نہیں پائے جاتے تھے۔ تاہم دسمبرمیں ہونے والی خونریزی نے مسلح گروپوں کو مذہب کو بہانا بنانے اور اسے سیاسی ہتھکنڈے کے طور پر استعمال کرنے کا موقع فراہم کر دیا۔

یورپی یونین ایک ہزار فوجیوں پر مشتمل فورس CAR میں متعین کر رہی ہے جو اس ملک میں تعینات چھ ہزار افریقی اور دو ہزار فرانسیسی فوجیوں پر مشتمل فورس میں شامل ہو جائے گی۔