مراکش میں طاقت ور زلزلہ، دو ہزار سے زائد ہلاکتیں

مراکش کے اسی نام کے شہر سے ہفتہ دس ستمبر کی صبح موصولہ رپورٹوں کے مطابق زلزلے کے جھٹکے اتنے شدید تھے کہ مختلف شہروں میں ہزاروں کی تعداد میں عام شہری انتہائی خوف کے عالم میں نیند سے جاگ کر اپنے گھروں سے باہر نکل آئے۔

ترکی: زلزلے کے بعد 'پراسرار' بچی اپنی ماں سے مل گئی

مقامی وقت کے مطابق یہ زلزلہ جمعے کی رات 11 بج کر 11 منٹ پر آیا اور ریکٹر اسکیل پر اس کی شدت 6.8 ریکارڈ کی گئی۔

امریکی جیولوجیکل سروے کے ماہرین کے مطابق شمالی افریقہ کی اس عرب ریاست کا شہر مراکش ملکی اور غیر ملکی سیاحوں کی ایک پسندیدہ منزل ہے اور اس زلزلے نے جس علاقے کو سب سے زیادہ متاثر کیا، وہ مراکش شہر سے جنوب مغرب کی طرف تقریباﹰ 72 کلومیٹر (45 میل) کے فاصلے پر واقع ہے۔

ساحلی علاقوں میں بھی جھٹکے

اس زلزلے کے جھٹکے صرف مراکش اور اس کے گرد و نواح میں ہی نہیں بلکہ ملک کے دور دراز ساحلی شہروں اور علاقوں تک میں بھی محسوس کیے گئے۔ ان شہروں میں رباط، کاسا بلانکا اور الصویرہ بھی شامل ہیں۔

مراکش شہر کے ایک 33 سالہ رہائشی عبدالحق العمرانی نے فرانسیسی نیوز ایجنسی اے ایف ہی کو بتایا، ''زیادہ تر افراد نیند میں تھے۔ اچانک انتہائی طاقت ور جھٹکے لگنے لگے اور ہمیں اندازہ ہو گیا کہ یہ زلزلہ تھا۔‘‘

زلزلے سے ترک نژاد جرمنوں کے ریٹائرمنٹ پلان کھٹائی میں

العمرانی کے مطابق، ''میں باہر نکلا اور میں  نے دیکھا کہ عمارتیں ہل رہی تھیں۔ میں نے دیکھا کہ اور بھی بہت سے شہری اپنے گھروں سے باہر کھلی جگہوں پر جمع ہو چکے تھے۔ ہر کوئی خوف زدہ تھا۔ بچے رو رہے تھے اور زلزلے کے نتیجے میں کچھ دیر کے لیے بجلی کا نظام اور ٹیلی فون رابطے بھی منقطع ہو گئے تھے۔‘‘

ہلاکتوں کی مصدقہ تعداد

مراکش کی وزارت داخلہ نے ہفتہ 10 ستمبر کی صبح بتایا کہ زلزلے کے نتیجے میں بہت سی عمارات تباہ ہو گئیں اور ہلاکتوں کی مصدقہ تعداد بھی مسلسل بڑھتی جا رہی ہے۔ حکام نے بتایا کہ مقامی وقت کے مطابق آج ہفتے کی صبح تک 632 افراد کی ہلاکت کی تصدیق ہو چکی تھی۔ بعد دوپہر تک یہ تعداد بڑھ کر کم از کم 820 ہو چکی تھی۔

سرکاری ذرائع کے مطابق اس زلزلے نے مراکش کے جن صوبوں اور شہروں کو سب سے زیادہ متاثر کیا، ان میں الحاوز، تارودانت، ورزازات، شیشاوہ، ازیلال اور یوسفیہ کے علاوہ مراکش، اکادیر اور کاسا بلانکا بھی شامل ہیں۔

پاکستان اور افغانستان میں زلزلے سے متعدد افراد ہلاک اور زخمی

ہنگامی امدادی کارروائیوں کے ملکی محکمے کے اعلیٰ حکام نے بتایا کہ زلزلے کے باعث آخری خبریں آنے تک 329 افراد کے زخمی ہونے کی بھی تصدیق ہو چکی تھی، جن میں سے 51 کی حالت نازک تھی۔

بین الاقوامی سطح پر افسوس اور یکجہتی کا اظہار

مراکش میں اس طاقت ور زلزلے کے باعث سینکڑوں کی تعداد میں انسانی ہلاکتوں اور بے شمار عمارات کی تباہی کے بعد بیرونی دنیا کے بہت سے ممالک اور ان کے رہنماؤں نے مراکش کے ساتھ افسوس اور ہمدردی کا اظہار کرتے ہوئے مدد کی پیشکش بھی کی ہے۔

ترکی اور شام میں تباہ کن زلزلہ، ایک ماہ بعد صورتحال کیسی ہے؟

ملکی میڈیا نے بتایا کہ یہ زلزلہ مراکش میں آج تک آنے والا شدید ترین زلزلہ تھا۔

جرمنی کے چانسلر اولاف شولس اور بھارتی وزیر اعظم نریندر مودی نے بھی مراکش کی حکومت اور عوام کے ساتھ اس ہلاکت خیز قدرتی آفت کے بعد یکجہتی کا اظہار کیا ہے اور کہا ہے کہ انہیں اتنی زیادہ انسانی ہلاکتوں پر گہرا دکھ ہوا ہے۔

قدرتی آفات سے ہونے والے نقصان کا اندازہ کیسے لگایا جاتا ہے؟

مراکش کے ہمسایہ ملک الجزائر میں شہری دفاع کے محکمے نے تصدیق کی ہے کہ اس زلزلے کے جھٹکے الجزائر میں بھی محسوس کیے گئے، تاہم وہاں اس وجہ سے انسانی ہلاکتیں اور مادی نقصانات دونوں بہت کم ہوئے۔

مراکش میں گزشتہ تباہ کن زلزلہ 2004ء میں آیا تھا، جس کی شدت ریکٹر اسکیل پر 6.7 تھی اور جو 926 انسانی اموات کا سبب بنا تھا۔

م م / ش ر (اے ایف پی، روئٹرز، اے پی)