مشال خان کے قتل کا مرکزی ملزم گرفتار

خبر رساں ادارے ایسوسی ایٹڈ پریس کے مطابق پاکستان کے شمال مغربی صوبہ خیبر پختونخوا کے شہر مردان میں اپریل 2017ء میں پیش آنے والے اس واقعے میں لوگوں کو مشال خان کے خلاف بھڑکانے والے شخص کو گرفتار کر لیا گیا ہے۔ ضلعی پولیس افسر سعید خان نے ایسوسی ایٹڈ پریس کو بتایا کہ عارف خان نامی یہ شخص اپریل 2017ء سے روپوش تھا۔

مردان یونیورسٹی میں طلبہ کی طرف سے شدید تشدد کر کے 23 سالہ طالب علم مشال خان کو جان سے مار دیا گیا تھا۔ تاہم یہ بات بعد میں واضح ہوئی کہ اس پر لگایا جانے والا یہ الزام غلط تھا کہ اس نے سوشل میڈیا پر توہین آمیز مواد پوسٹ کیا تھا۔

یہ گرفتاری ایک ایسے موقع پر سامنے آئی ہے جب چند روز قبل ہی ایک اپیل کورٹ نے اُن 25 مشتبہ افراد کو دی گئی تین تین برس قید کی سزا کو معطل کرتے ہوئے انہیں رہا کرنے کا حکم جاری کیا تھا جن پر الزام تھا کہ وہ مشال خان پر تشدد کرنے والوں میں شامل تھے۔

فروری میں ایک انسداد دہشت گردی کی ایک عدالت نے مشال خان قتل کیس میں ایک شخص کو سزائے موت جبکہ پانچ دیگر کو عمر قید کی  سزا سنائی تھی۔ اپیل کورٹ کی طرف سے اِن سزاؤں میں کوئی رد وبدل نہیں کیا گیا۔

پاکستان میں توہین مذہب ایسا جرم ہے جس کی سزا موت مقرر ہے۔ تاہم بہت سے ایسے واقعات سامنے آ چکے ہیں جن میں لوگ اپنے مختلف مقاصد پورے کرنے کے لیے مخالفین پر توہین مذہب کا غلط الزام لگا دیتے ہیں۔ پاکستانی صوبہ پنجاب کے سابق گورنر سلمان تاثیر کو اسی قانون کے حوالے سے دیے گئے بیانات کے باعث ان کے ایک محافظ نے گولیاں مار کر قتل کر دیا تھا۔