موٹاپے سے تحفظ، شکر کا روزانہ استعمال آدھا کر دیں

اس عالمی ادارے نے شکر کے استعمال کے نقصانات اجاگر کرتے ہوئے کہا ہے کہ عالمی سطح پر صحت عامہ کے گونا گوں مسائل میں اضافے کے سبب اُس نے موٹاپے سے جنم لینے والی بیماریوں کے خلاف اپنی مہم تیز تر کر دی ہے۔

اقوام متحدہ کے صحت سے متعلق اس ادارے کے مطابق 2002ء میں چینی یا شکر کے روزانہ استعمال سے متعلق طے کی جانے والی گائیڈ لائنز یا رہنما مشوروں کے تحت ایک عام انسان کی روزانہ بنیادوں پر energy intake یا غذا کے ذریعے حاصل کی جانے والی کُل توانائی کا 10 فیصد تک چینی پر مشتمل ہونا چاہیے۔ تاہم اب اس ادارے نے کہا ہے کہ شوگر کی اس مقدار کو نصف کر دینا بہت سی بیماریوں سے بچاؤ کے لیے بہتر ثابت ہوگا۔

ڈبلیو ایچ او نے اس حوالے سے کہا ہے کہ چینی کے روزانہ استعمال میں نصف کمی کا مطلب یہ ہے کہ اوسط قد و قامت والے کسی شخص کو 24 گھنٹے میں زیادہ سے زیادہ چائے کے چھ چمچ کے برابر شکر کو اپنی غذا کا حصہ بنانا چاہیے۔ اس کی مزید وضاحت کرتے ہوئے کہا گیا ہے کہ چھ چمچ چینی کا مطلب یہ ہے کہ کھانے اور پینے دونوں طرح کی اشیاء سے حاصل کردہ شوگر کی مقدار اس سے زیادہ نہیں ہونی چاہیے۔ یعنی اس میں میٹھی خوردنی اشیاء، مشروبات، شہد، سیرپ وغیرہ اور قدرتی شکر سب شامل ہیں۔ واضح رہے کہ پھلوں میں قدرتی شکر کافی مقدار میں موجود ہوتی ہے۔

ڈبلیو ایچ او کی گائیڈ لائنز میں مزید کہا گیا ہے، ’’غیر متعدی امراض اور موٹاپے سے بچنے کے لیے سادہ شکر کے استعمال سے پرہیز بہت ضروری ہے کیونکہ اس نوعیت کی شکر کا تعلق غیر معیاری غذا سے ہوتا ہے۔‘‘

عالمی ادارہ صحت کے اندازوں کے مطابق دنیا بھر میں ہر سال 2.8 ملین افراد محض زیادہ جسمانی وزن اور موٹاپے کے باعث پیدا ہونے والی بیماریوں کے نتیجے میں موت کے منہ میں چلے جاتے ہیں۔ ان میں ایسی اموات شامل نہیں، جن کا سبب ذیابیطس، امراض قلب اور سرطان جیسی بیماریاں بنتی ہیں۔ ورلڈ ہیلتھ آرگنائزیشن کے اندازوں کے مطابق دنیا بھر میں پانچ سال سے کم عمر کے 40 ملین بچے موٹاپے کا شکار ہیں۔۔

دنیا کے بہت سے معاشروں میں دانتوں کی مختلف بیماریاں بھی صحت کے شعبوں کے لیے مہنگے مسائل کا سبب بن رہی ہیں۔ ترقی یافتہ صنعتی ممالک میں عوام کی ڈینٹل ہیلتھ یا دانتوں کی صحت پر اٹھنے والے اخراجات ہیلتھ کیئر بجٹ کا دس فیصد بنتے ہیں۔ رپورٹ میں کہا گیا ہے کہ شوگر زیادہ تر پہلے سے تیار شدہ کھانوں میں شامل ہوتی ہے، جو بطور شکر نظر نہیں آتی۔ عام سافٹ ڈرنکس کے کسی کین میں اوسطاﹰ 40 گرام کے برابر تک شکر شامل ہوتی ہے۔