میانمار: فوجی کارروائی، روہنگیا مسلمانوں پر قیامت گزر گئی

فرانسیسی نیوز ایجنسی اے ایف پی نے جنیوا سے اپنی رپورٹ میں اقوام متحدہ کے انسانی حقوق کے دفتر کے حوالے سے بتایا ہے کہ فوج کی یہ کارروائی نسلی تطہیر کے زمرے میں آتی ہے۔

اقوام متحدہ کے ہیومن رائٹس آفس نے بنگلہ دیش میں مقیم 204 روہنگیا مہاجرین کے انٹرویوز کی بنیاد پر ایک رپورٹ تیار کی ہے، جس میں اقوام متحدہ ہی کے سابقہ الزامات کا اعادہ کرتے ہوئے کہا گیا ہے کہ میانمار میں ’بڑی حد تک اس بات کا امکان ہے‘ کہ انسانیت کے خلاف جرائم کا ارتکاب کیا گیا ہے۔

اس رپورٹ میں کہا گیا ہے کہ میانمار کی فوج نے شمال مغربی ریاست راکھین میں دَس اکتوبر کو ’ایریا کلیئرنس آپریشنز‘ شروع کیے تھے، جن کے دوران ممکنہ طور پر سینکڑوں افراد کو ہلاک کر دیا گیا۔ روہنگیا مہاجرین کے مطابق میانمار کی سکیورٹی فورسز یا پولیس اور فوج کے ساتھ مل کر کارروائیاں کرنے والے سویلین جنگجوؤں کی جانب سے انسانی حقوق کی سنگین خلاف ورزیاں کی گئیں۔

اقوام متحدہ کے انسانی حقوق کے دفتر نے عینی شاہدین کے حوالے سے بتایا کہ ایک آٹھ ماہ کے بچے کو قتل کر دیا گیا جبکہ پانچ سکیورٹی آفیسرز نے اُس کی ماں کو گینگ ریپ کا نشانہ بنایا۔ اس رپورٹ کے مطابق چھ سال یا اِس سے کم عمر کے تین بچوں کو چھُروں سے ذبح کر دیا گیا۔

اقوام متحدہ کی حقوقِ انسانی کونسل کے چیئرمین زید بن رعد الحسین نے ایک بیان میں کہا:’’یہ کیسی نفرت ہے، جس کے باعث کوئی شخص ماں کے دودھ کے لیے چِلاتے ایک نومولود بچے کو چھُرا گھونپ دیتا ہے؟‘‘

اس رپورٹ کی تیاری کے لیے جن روہنگیا مہاجرین سے بات چیت کی گئی، اُن میں سے سینتالیس فیصد کا کہنا تھا کہ اُن کے خاندان کا کوئی نہ کوئی فرد اس آپریشن کے دوران مارا گیا ہے۔ تینتالیس فیصد کا کہنا تھا کہ اُن کی آبروریزی کی گئی۔

جنیوا میں حقوقِ انسانی کونسل کے نمائندوں کے مطابق میانمار میں ایک گروپ باقاعدہ منصوبہ بندی کے ساتھ اور تشدد اور دہشت گردی کا راستہ اختیار کرتے ہوئے ایک دوسرے گروپ کو اُس کے آبائی علاقے سے نکال رہا ہے۔ میانمار کی آبادی کی اکثریت بودھ مذہب کے ماننے والوں کی ہے، جو روہنگیا سے شدید نفرت کرتے ہیں۔

میانمار کئی نسلوں پہلے بنگلہ دیش سے نقل مکانی کر کے میانمار میں آباد ہو جانے والے روہنگیا مسلمانوں کو اپنے ملک کی نسلی اقلیتوں میں شمار نہیں کرتا۔ میانمار میں اپنے خلاف ہونے والے مظالم سے تنگ آ کر تقریباً ستّر ہزار روہنگیا فرار ہو کر ہمسایہ بنگلہ دیش پہنچ چکے ہیں۔

میانمار کی حکومت، جس کی قیادت امن کا نوبل انعام حاصل کرنے والی آنگ سان سُوچی کر رہی ہیں، روہنگیا مسلمانوں کے خلاف مظالم کی تفصیلات کو گھڑی ہوئی کہانیاں قرار دیتی ہے اور اس اقلیت کو تحفظ فراہم کرنے کے لیے بین الاقوامی دباؤ کے خلاف مزاحمت کرتی چلی آ رہی ہے۔