ناروے کے سفارتی عملے کا لبنان سے انخلاء

اسرائیل اور ایرانی حمایت یافتہ عسکری تنظیم حزب اللہ کے درمیان جاری مسلح تنازعے کی وجہ سے لبنان کی انتہائی خراب سکیورٹی صورت حال کے تناظر میں ناورے نے بیروت میں قائم اپنے سفارت خانے سے عملہ نکال لیا ہے۔

حالیہ دنوں میں اسرائیل کی جانب سےلبنان پر متعدد حملے کیے گئے ہیں۔ ناورے کی وزارت خارجہ کے مطابق بیروت میں بھی اسرائیلی فضائی کارروائیاں جاری ہیں اور اقوام متحدہ کی امن فوج بھی اس کا نشانہ بنی ہے۔

بیان میں کہا گیا ہے کہ ناروے کے سفیر اور چند دیگر ناروجین سفارت کار فی الحال لبنان ہی میں رہیں گے۔ ''لبنان کی سکیورٹی صورتحال بدستور انتہائی کشیدہ اور غیر واضح ہے۔ بیروت میں نارویجیئن سفارت خانے کے قریب بھی بم برسے ہیں۔ بعض سفارت کار اسی لیے عارضی طور پر لبنان چھوڑ چکے ہیں۔‘‘

اس سے قبل ناورے نے لبنان میں موجود اپنے شہریوں کو لبنان چھوڑے کی ہدایات جاری کی تھیں۔

دوسری جانب جمعرات سے اب تک جنوبی لبنان میں اسرائیلی حملوں میں اقوام متحدہ کے امن مشن کے چار اہلکار زخمی ہونے کے بعد امریکہ اور یورپی ممالک کی جانب سے اسرائیل پر تنقید کی جا رہی ہے۔

اسرائیلی مسلح افواج کی جانب سے بتایا گیا ہے کہ اقوام متحدہ کے امن مشن کی پوزیشنوں کے قریب سے اسرائیلی فوجیوں نے ''فوری خطرہ‘‘ محسوس ہونے پر فائرنگ کی۔

یہ بات اہم ہے کہ اسرائیل نے رواں برس ستمبر سے لبنان میں اپنی عسکری کارروائیوں کو واضح طور پر بڑھایا ہے، جب کہ اس دوران حزب اللہ کے سربراہ حسن نصر اللہ سمیت متعدد اہم عسکری کمانڈر مارے گئے ہیں۔

ع ت، ش ر ، م ا (ڈی پی اے)