نایاب پانڈا کے ہاں جڑواں بچوں کی پیدائش، برلن میں خوشی

برلن کے چڑیا گھر کی انتظامیہ  نے پیر کے روز اعلان کیا کہ مادہ پانڈا مینگ مینگ نے ہفتے کی صبح چھ بج کر چون منٹ پر گلابی رنگ کے جڑواں بچوں کو جنم دیا۔ یہ پیدائش کے وقت اتنے چھوٹے تھے کہ انہیں آسانی سے ہتھیلی پر اٹھایا جا سکتا تھا۔

چڑیا گھر کی انتظامیہ کے مطابق  6 سالہ مادہ پانڈا مینگ مینگ نے پیدائش کے فوری بعد ہی ممتا کا مظاہرہ کرتے ہوئے ان ننھے بچوں کو اپنے پیٹ پر رکھ کر اپنے بڑے بڑے پنجوں، گرم سانسوں اور نرم کھال کے ذریعے گرمائش پہنچائی۔ چڑیا گھر میں جانوروں کی دیکھ بھال پر مامور افراد نے گزشتہ ہفتے ہی مینگ مینگ کے حاملہ ہونے کی تصدیق کی تھی۔

اپریل میں مینگ مینگ نے 9 سالہ  ژیاؤ چنگ کے ساتھ ملاپ کیا تھا اور حمل کے امکان کو بڑھانے کے لیے مصنوعی فرٹیلائزیشن کا بھی استعمال کیا گیا تھا۔

یون سن 2017 میں پانڈا کی ایک جوڑی کو ایک ملین یورو کے عوض چین سے ادھار لیا گیا تھا۔ ان جوڑی میں مینگ مینگ مادہ اور ژیاؤ چنگ نر پانڈا ہے۔ یہ جرمنی کے کسی بھی چڑیا گھر میں پانڈوں کی واحد جوڑی ہے۔

 2017ء میں جرمنی میں جی ٹوئنٹی سربراہ کانفرنس بھی منقعد ہوئی تھی۔ اس موقع پر چینی صدر شی جن پنگ اور جرمن چانسلر انگیلا میرکل نے مل کر برلن کے اس چڑیا گھر کا دورہ کرتے ہوئے پانڈا کے اس جوڑی کو بھی دیکھا تھا۔

اس پانڈا جوڑی کو برلن لانے کا مقصد ان کی افزائش نسل تھا۔ افزائش نسل کی یہ کوششیں گزشتہ دو برس سے جاری تھیں، اس سلسلے میں جانوروں کے ڈاکٹر اور چینی ماہرین حیاتیات کی بھی مدد لی گئی تھی۔

م ش ع ا