’ٹرمپ نے حملے کا سوچا تھا‘: ونیزویلا کی فوج تیار رہے، مادورو

صدر نکولس مادورو نے اپنی فوج کے سربراہ کو حکم دیا ہے کہ اُن کی فوج کو ہر وقت الرٹ رہنا چاہیے۔ مادُورو نے یہ بھی کہا کہ اس وقت اُن کی سرزمین کو شدید خطرات کا سامنا ہے اور ملک کا ہر ممکن طریقے سے دفاع کرنے کے لیے فوج کا الرٹ رہنا ازحد ضروری ہے۔ انہوں نے یہ بھی کہا کہ اُن کا ملک امن کا حامی ہے لیکن اُنہیں  ملکی تاریخ کے سنگین ترین خطرے کا سامنا ہے۔

مادورو نے اپنی ملکی فوج کو چوکس رہنے کا حکم اُس مبینہ رپورٹ کے تناظر میں دیا ہے، جس کے مطابق صدر ڈونلڈ ٹرمپ وینزویلا پر فوج کشی کا ارادہ رکھتے تھے۔ مادورو کا یہ بھی کہنا ہے کہ امریکی فوج کشی وینزویلا کے تمام مسائل کا حل نہیں ہو سکتی۔

امریکی نیوز ایجنسی ایسوسی ایٹڈ پریس کی ایک رپورٹ کے مطابق امریکی صدر ٹرمپ نے اپنے عسکری مشیران سے چند ماہ قبل دریافت کیا تھا کہ امریکا وینزویلا میں فوج کشی کیوں نہیں کر سکتا۔ اس موقع پر سابق وزیر خارجہ ریکس ٹلرسن اور سابق قومی سلامتی کے مشیر ایچ آر میک ماسٹر نے ان کے ساتھ اتفاق نہیں کیا اور اس کارروائی کے امریکا پر منفی اثرات مرتب ہونے کا اشارہ دیا تھا۔ ان دونوں اعلیٰ سطحی اہلکاروں کو ٹرمپ نے اُن کے منصبوں سے کچھ عرصہ قبل فارغ کر دیا تھا۔

ایسوسی ایٹد پریس کے مطابق رپورٹ میں یہ بھی بتایا گیا کہ لاطینی امریکا کے چار ملکوں کے سربراہان نے بھی وینزویلا کے اندرونی حالات کے تناظر میں امریکی صدر سے ملاقات کی تھی۔ اس ملاقات میں ٹرمپ نے فوج کشی کے ممکنہ ارادے کا اظہار کیا تھا لیکن تمام مہمان صُدور نے اسے مسترد کر دیا تھا۔ وائٹ ہاؤس نے اس رپورٹ کے مندرجات پر کسی بھی قسم کا ردعمل ظاہر کرنے سے انکار کر دیا ہے۔

امریکی صدر نے گزشتہ برس اگست میں ایسا اشارہ دیا تھا کہ وہ وینزویلا کے حوالے سے کچھ نہ کچھ کرنے کا ارادہ رکھتے ہیں اور اسی بیان میں فوجی ایکشن کو بھی خارج از امکان نہیں قرار دیا تھا۔ ٹرمپ کے خیالات کے سامنے آنے پر وینزویلا کے صدر نے عالمی برادری کی توجہ امریکی صدر کے بیان کی جانب مبذول کرانے کی کوشش کی تھی۔ انہوں نے پوپ فرانسس سے بھی اس تناظر میں اپیل کی تھی کہ وہ امریکی صدر کو فوج کشی سے گریز کرنے پر قائل کریں۔

یہ امر اہم ہے کہ وینزویلا کے سیاسی، سماجی اور اقتصادی حالات دگرگوں ہو چکے ہیں۔ اپوزیشن ملکی صدر سے شدید ناراض ہے۔ مادورو نے اپنے اقتدار کو مضبوط کرنے کے لیے اپنی سوچ کے مطابق ایک نئی پارلیمنٹ کو نشکیل دے کر دستوری ترامیم منظور کروا لی ہیں۔ حالیہ صدارتی انتخابات میں انہیں اپوزیشن کے کسی بڑے اور اہم امیدوار کا سامنا نہیں تھا کیونکہ تمام اپوزیشن نے انتخابی عمل کا بائیکاٹ کر رکھا تھا۔ اقتصادی گراوٹ کی وجہ سے وینزویلا کو لاقانونیت کا بھی سامنا ہے۔