’ٹرمپ کے سابق مشیر نے یورپی سیاستدانوں کو رقوم دیں‘

خبر رساں ادارے اے ایف پی نے بتایا ہے کہ گزشتہ امریکی صدارتی انتخابات میں مبینہ روسی مداخلت کی تحقیقات کرنے والی ٹیم کے خصوصی عہدیدار رابرٹ مُلر نے پال مانافورٹ پر نئی فرد جرم عائد کر دی ہے۔

انتخابات میں دخل اندازی، 13 روسیوں پر الزام عائد کر دیا گیا

روس کے حوالے سے تحقیقات پر ٹرمپ کی ٹوئیٹس تنقید کی زد میں

روس کے ساتھ روابط، ٹرمپ کے سابق قریبی ساتھی نے اعتراف کر لیا

 پال مانافورٹ پر الزام عائد کیا گیا ہے کہ انہوں نے سن دو ہزار بارہ اور سن دو ہزار تیرہ کے دوران سینیئر یورپی سیاستدانوں کو دو ملین یورو سے زائد کی رقوم فراہم کی تھیں تاکہ تب لابی کرتے ہوئے یوکرائن میں روس نواز سیاستدانوں کو مضبوط کیا جا سکے۔

اس نئی فرد جرم کے تحت مانافورٹ پر منی لانڈرنگ، سازش اور غلط بیانی کے الزامات عائد کیے گئے ہیں۔ بتایا گیا ہے کہ مانافورٹ نے یوکرائن کے سابق روس نواز صدر وکٹور یانوکووچ کے لیے یورپی لابی کھڑی کرنے کی کوشش کی تھی۔

 یانوکووچ سن دو ہزار دس تا دو ہزار چودہ یوکرائن کے صدر رہے تھے تاہم حکومت مخالف تحریک کے نتیجے میں انہیں اپنے منصب سے الگ ہو کر روس فرار ہونا پڑ گیا تھا۔ رابرٹ مُلر کے مطابق مانافورٹ نے یانوکووچ کے روس فرار ہونے کے بعد بھی مبینہ طور پر اپنا لابی کرنے کا سلسلہ جاری رکھا تھا۔

امریکا میں سن دو ہزار سولہ کے صدارتی انتخابات میں ڈونلڈ ٹرمپ کی مہم کے سربراہ رہنے والے پال مانافورٹ نے ان الزامات کو مسترد کر دیا ہے۔ مانافورٹ پر البتہ ایسا کوئی الزام عائد نہیں کیا گیا کہ انہوں نے اس الیکشن میں روسی مداخلت کو ممکن بنانے کے لیے کوئی قدم اٹھایا تھا۔

دوسری طرف ٹرمپ کی صدارتی انتخابی مہم کے نائب سربراہ رک گیٹس نے بھی اعتراف کر لیا ہے کہ انہوں نے سن دو ہزار سولہ کے صدارتی انتخابات میں مبینہ روسی مداخلت کے حوالے سے غلط بیانی سے کام لیا تھا۔

گیٹس نے کہا ہے کہ وہ رابرٹ ملر اور ان کی ٹیم کے ساتھ مکمل تعاون کریں گے۔ 45 سالہ گیٹس نے یہ بھی کہا کہ وہ اس تفتیش کے دوران مانافورٹ کے یوکرائن میں مشاورتی کام اور مالیاتی امور کے بارے میں بھی معلومات فراہم کریں گے۔