ٹرمپ کے منصوبے کی قدر کرتے ہیں، سعودی عرب

سعودی عرب کی وزارت خارجہ کی طرف سے جاری ہونے والے ایک بیان میں مزید کہا گیا ہے کہ امریکی صدر ڈونلڈ ٹرمپ کی طرف سے تجویز کیے گئے منصوبے کے بارے میں اگر کوئی عدم اتفاق ہے تو اسے امریکی سرپرستی میں مذاکرات کے ذریعے حل کیا جائے ''تاہم امن عمل پر آگے بڑھا جائے تا کہ ایک ایسا معاہدہ طے پا سکے جس میں فلسطینی عوام کے جائز حقوق حاصل کیے جا سکیں۔‘‘

سعودی وزارت خارجہ کے بیان کے مطابق، ''سعودی بادشاہت صدر ٹرمپ کی انتظامیہ کی طرف سے فلسطینیوں اور اسرائیل کے درمیان ایک جامع امن معاہدے کے لیے کوششوں کی قدر کرتی ہے۔‘‘

فلسطینیوں کی طرف سے امریکی صدر ڈونلڈ ٹرمپ کے مجوزہ امن معاہدے کی شدید مخالفت کرتے ہوئے کہا گیا ہے کہ منصوبہ ''تاریخ کے کوڑے دان‘‘ میں جانے کے قابل ہے۔ ٹرمپ نے اپنے منصوبے کو تاریخی قرار دیا تھا۔

سعودی عرب کی سرکاری نیوز ایجنسی ایس پی اے کے مطابق، ''سعودی شاہ سلمان نے فلسطینی صدر محمود عباس کو ٹیلی فون کیا اور فلسطینی عوام اور فلسطین کے معاملے پر سعودی عرب کے دوٹوک مؤقف کو دہرایا۔‘‘

سعودی وزارت خارجہ کی طرف سے صدر ٹرمپ کے امن منصوبے کے بارے میں جاری ہونے والے بیان میں 2002ء کے عرب امن منصوبے کا بھی حوالہ دیا گیا ہے جس میں یہ بات زور دے کر کہی گئی ہے کہ ''اس تنازعے کے فوجی حل سے اس علاقے اور کسی بھی فریق کے لیے امن کا باعث نہیں بنے گا۔‘‘

ڈی ڈبلیو کے ایڈیٹرز ہر صبح اپنی تازہ ترین خبریں اور چنیدہ رپورٹس اپنے پڑھنے والوں کو بھیجتے ہیں۔ آپ بھی یہاں کلک کر کے یہ نیوز لیٹر موصول کر سکتے ہیں۔

ا ب ا / ع ا (اے ایف پی)