پاکستان آئی ایم ایف امدادی پروگرم کے حجم میں وسعت کا متمنی

موجودہ وزیراعظم شہباز شریف کی کابینہ میں شامل وزیر خزانہ مفتاح اسمعٰیل کا کہنا ہے کہ ان کی حکومت انٹرنیشنل مانیٹری فنڈ سے چھ بلین ڈالر کے امدادی پیکج کے حجم اور دوارنیے کو بڑھانے کی متمنی ہے۔ وہ اس وقت عالمی مالیاتی ادارے کے ساتھے بات چیت کے لیے امریکی دارالحکومت واشنگٹن میں موجود ہیں۔ عالمی ادارے نے امداد پیکج میں اضافے پر رضامندی کا اظہار کیا ہے۔

نیا مالیاتی بل، کیا پاکستان میں مہنگائی اور بڑھے گی؟

تیل اور بجلی پر رعایت ختم کرنے کی شرط

انٹرنیشنل مانیٹری فنڈ نے موجودہ امدادی پیکج میں دو بلین ڈالر کا اضافی قرض دینے کی یقین دہانی اس شرط پر کرائی ہے کہ موجودہ حکومت تیل اور بجلی پر دی گئی رعایت کو ختم کرے گی۔ واشنگٹن میں مفتاح اسمعٰیل کا کہنا ہے کہ تیل کی قیمت میں بتدریج اضافہ کیا جائے گا۔ ان کے مطابق کار اور موٹر سائیکل کے لیے علیحدہ علیحدہ تیل کی قیمت کا تعین ممکن ہے۔

پاکستان عالمی مالیاتی ادارے کے قرض سے اپنی ادائیگیوں کو بہتر کرنے کے ساتھ ساتھ زرِ مبادلہ کے ذخائر کو بہتر کرنے کی خواہش رکھتا ہے۔ عالمی ادارے نے بھی تصدیق کی ہے کہ اسلام آباد حکومت تیل اور بجلی پر دی گئی رعایتوں کو یقینی طور پر ختم کرے گی۔

مزید بات چیت مئی میں

پاکستانی وزیر خزانہ مفتاح اسمعٰیل نے یہ بھی بتایا کہ انٹرنیشنل مانیٹری فنڈ کی جانب سے قرض میں دو بلین ڈالر کا اضافہ اور امدادی پروگرام کی مدت کو چھ سے سات سال کرنے پر مزید بات چیت مئی میں ملکی دارالحکومت میں ہوگی۔ اس بات چیت میں عالمی ادارے کا اعلیٰ سطحی وفد اسلام آباد کا دورہ کرے گا اور ان مذاکرات کے بعد تمام تفصیلات عام کی جائیں گی۔

معیشت میں بہتری کے دعوے

پاکستانی وزیر خزانہ نے آئی ایم ایف کے ساتھ ہونے والے مذاکرات کو تعمیری اور مثبت قرار دیا تھا۔ یہ بات چیت عالمی ادارے کے ساتویں ای ایف ایف پیکج کا حصہ ہیں۔ اس کے لیے آئی ایم ایف نے رضامندی سن 2019 میں دی تھی۔ یہ بھی اہم ہے کہ پاکستان کی جانب سے بین الاقوامی ادائیگیوں میں سست روی پیدا ہونے پر اپنی تشویش کا اظہار بھی کیا ہے۔ آئی ایم ایف کی خواہش ہے کہ پاکستانی حکومت مالیاتی اقدامات کو سخت انداز میں نافذ کرے۔

عمران خان کی حکومت کے خاتمے کے بعد بننے والی نئی حکومت نے واضح کیا ہے کہ اسے شدید نوعیت کے اقتصادی چیلنجز کا سامنا ہے۔ ان میں ملکی جی ڈی پی میں کمی کا امکان بھی ظاہر کیا گیا ہے۔ واشنگٹن جانے سے قبل مفتاح اسمعٰیل نے کہا تھا کہ عالمی مالیاتی ادارے سے مزید قرض لینے کے لیے حکومتی اخراجات میں بڑی کٹوتیاں کرنے کے ساتھ ساتھ ترقیاتی منصوبوں میں بھی کمی کرنی ہو گی۔

ع ح/ ر ب (روئٹرز)