پاکستان: دو مختلف حادثات میں 34 افراد ہلاک

اطلاعات کے مطابق صوبہ پنجاب اور پاکستانی زیرانتظام کشمیر کے سرحدی علاقے آزاد پٹن میں ایک بس گہری کھائی میں جا گری۔ ریسکیو سروس کے مطابق اب تک بائیس افرادکی ہلاکت کی تصدیق ہو چکی ہے، جن میں ایک بچہ، پندرہ مرد اور چھ خواتین شامل ہیں۔

دوسری جانب بلوچستان میں مکران کوسٹل ہائے وے پر ایک بس بے قابو ہو کرکھائی میں گر گئی۔ اس واقعے میں 12 افراد ہلاک ہو گئے۔ بتایا گیا ہے کہ یہ بس زائرین کو لے کر ایران کی جانب گئی تھی، تاہم اسے ایران میں داخلے سے روک دیے جانے کے بعد لوٹ رہی تھی۔

مقامی پولیس افسر اسلم بنگل زئی نے خبر رساں ادارے اے ایف پی کو بتایا کہ کوسٹل ہائی وے کا یہ حصہ بالخصوص کئی خطرناک موڑوں کا حامل ہے۔

یہ واقعہ ایرانی سرحدی قبصے پشین سے پانچ سو کلومیٹر اور پاکستانی قصبے اوتھل سے تقریباﹰ سو کلومیٹر دور پہاڑی علاقے میں پیش آیا۔

گوادر ضلعے کے ایک سینیئر حکومتی اہلکار حمود الرحمان نے بتایا کہ زائرین کو لے کر یہ بس ایران گئی تھی، تاہم سفری دستاویزات میں کچھ مسائل کی وجہ سے اسے واپس لوٹا دیا گیا۔

واضح رہے کہ ایران میں شیعہ زائرین کیبس کو پیش آنے والے ایک حادثےمیں ہلاک ہونے والے 28 افراد کی لاشیں ہفتے کے روز پاکستان کو لوٹائی گئی ہیں۔ منگل کی شب زائرین کی یہ بس ایرانی صوبے یزد میں الٹ کر آگ کی لپیٹ میں آ گئی تھی۔ اس بس میں سوار 51 پاکستانی زائرین میں سے 28 ہلاک ہو گئے تھے۔

ع ت ، ا ا (ڈپی پی اے)