پاکستان نے آئینی ترمیم پر اقوام متحدہ کی تنقید مسترد کر دی

پاکستان کے دفتر خارجہ نے جمعرات کے روز اقوام متحدہ کے انسانی حقوق کے سربراہ کی جانب سے آئینی ترمیم اور عدالتی آزادی کے حوالے سے کیے گئے بعض تبصروں کو مسترد کرتے ہوئے ان پر زور دیا کہ وہ نامعلوم امور پر بیان بازی کی بجائے اپنے مینڈیٹ پر توجہ دیں۔

اسلام آباد میں دفتر خارجہ کی ترجمان ممتاز زہرہ بلوچ نے ہفتہ وار میڈیا بریفنگ کے دوران کہا، ’’ہم ان بے بنیاد الزامات کو مسترد کرتے ہیں اور انسانی حقوق کے ہائی کمشنر کے دفتر (او ایچ سی ایچ آر) کو انسانی حقوق کی حقیقی اور سنگین خلاف ورزیوں پر توجہ مرکوز کرنے کا مشورہ دیتے ہیں، خاص طور پر ان جگہوں پر جہاں انسانی حقوق سے متعلق بین الاقوامی قوانین پوری طرح سے غیر موثر ہو چکے ہیں، یا پھر ایسے علاقوں میں جہاں مقبوضہ عوام پر ظلم کرنے کے لیے سخت قوانین نافذ کیے گئے ہیں۔‘‘

اسلام آباد کی جانب سے یہ شدید ردعمل اقوام متحدہ کے ہائی کمشنر برائے انسانی حقوق فولکر ترک کے اس بیان کے بعد آیا ہے، جس میں انہوں نے پاکستان میں 26 ویں آئینی ترمیم پر تشویش کا اظہار کیا تھا۔ واضح رہے کہ اس حوالے سے ملک میں بھی شدید سیاسی تنازعات ابھر کر سامنے آئے تھے اور اس پر اب بھی بحث جاری ہے۔

اس حوالے سے ایک سوال کے جواب میں ترجمان ممتاز زہرہ بلوچ نے کہا کہ او ایچ سی ایچ آر کے نتائج ’’غلط معلومات اور پاکستان میں ہونے والی پیش رفت کے بارے میں غلط فہمی‘‘ پر مبنی ہیں، جس کے نتیجے میں ’’غیر ضروری اور غلط نتائج‘‘ اخذ کیے گئے۔ انہوں نے مزید کہا کہ اقوام متحدہ کے کمشنر کے بیانات میڈیا رپورٹس، سوشل میڈیا پوسٹس اور سیاسی نوعیت کی قیاس آرائیوں پر مبنی ہیں۔

اقوام متحدہ کے ہائی کمشنر نے کیا کہا تھا؟

اقوام متحدہ میں انسانی حقوق کے سربراہ فولکر ترک نے پاکستان میں ہونے والی تازہ ترین آئینی ترمیم پر تشویش کا اظہار کرتے ہوئے اس بات پر زور دیا تھا کہ یہ عدلیہ کی آزادی کو ’’کمزور‘‘ کر دے گی۔

ترک کے دفتر نے منگل کے روز ان کا بیان سوشل میڈیا ایکس پر پوسٹ کیا تھا، جس میں کہا گیا، ’’تازہ ترین آئینی ترامیم،  بغیر کسی وسیع تر مشاورت اور بحث کے عجلت میں اختیار کی گئی، جو عدلیہ کی آزادی کو بری طرح مجروح کرے گی۔ آئینی اصلاحات کو بین الاقوامی انسانی حقوق کے قانون کے مطابق ہونا چاہیے۔‘‘

واضح رہے کہ پاکستانی پارلیمنٹ نے اتوار کے روز دیر رات گئے ہونے والی ووٹنگ میں 26 ویں آئینی ترمیم کو منظور کر لیا تھا، جس پر اب عمل بھی شروع کر دیا گیا ہے۔

امریکی کانگریس کے ارکان کے مکتوب کی مذمت

پاکستانی حکومت نے عمران خان کی رہائی اور انسانی حقوق سے متعلق امریکی کانگریس کے ارکان کی جانب سے صدر بائيدن کو لکھے گئے ایک خط کی بھی مذمت کی اور کہا کہ انہیں ملک کے سیاسی تنازعات میں الجھنے کی بجائے پاکستان امریکہ تعلقات کو مضبوط بنانے میں تعمیری کردار ادا کرنا چاہیے۔

دفتر خارجہ کی ترجمان محترمہ بلوچ نے کہا، ’’پاکستان کے اندرونی معاملات پر تبصرہ کرنے سے بین ریاستی طرز عمل اور سفارتی اصولوں کی خلاف ورزی ہوتی ہے۔ ہمیں یقین ہے کہ اس طرح کے خطوط اور بیانات نقصان دہ ہیں اور یہ پاکستان امریکہ کے درمیان دوطرفہ تعلقات کے مثبت محرکات سے ہم آہنگ نہیں ہیں۔‘‘

واضح رہے کہ حال ہی میں 60 سے زائد امریکی قانون سازوں نے صدر جو بائیڈن کے نام اپنے ایک خط میں اس بات پر زور دیا تھا کہ وہ سابق وزیر اعظم عمران خان سمیت پاکستان میں سیاسی قیدیوں کی رہائی کی کوششیں کریں۔

عمران خان سمیت پاکستان میں سیاسی قیدیوں کی رہائی کی وکالت کرنے کے لیے امریکی کانگریس کے ارکان کی جانب سے یہ پہلی اجتماعی اپیل ہے۔

تاہم دفتر خارجہ کے ترجمان نے قانون سازوں کے مکتوب کو مسترد کرتے ہوئے کہا کہ یہ پاکستان کی سیاسی صورتحال سے متعلق غلط فہم پر مبنی ہے۔

پاکستانی کمپنیوں پر پابندی کا معاملہ

حال ہی میں امریکہ نے پاکستان کی تقریباً دو درجن کمپنیوں کو بلیک لسٹ کرنے کا اعلان کیا تھا، جس سے متعلق ایک سوال کے جواب میں ترجمان نے اس کارروائی کو جانبدارانہ اور سیاسی طور پر محرک قرار دیا۔ ممتاز زہرہ بلوچ نے کہا کہ ماضی میں اسی طرح کی پابندیاں محض شک بنیاد پر عائد کی گئی تھیں۔

محترمہ بلوچ نے اس بات پر زور دیا کہ بعض ممالک ہتھیاروں کے عدم پھیلاؤ کے اصولوں پر سختی سے عمل پیرا ہونے کا دعویٰ کرتے رہے ہیں اور اس کے ساتھ ہی پسندیدہ ممالک کے لیے جدید فوجی ٹیکنالوجیز کے لیے لائسنس کی شرائط کو آسانی سے معاف بھی کر دیا ہے۔

انہوں نے کہا کہ اس طرح کے دوہرے معیار اور امتیازی طرز عمل عالمی سطح پر عدم پھیلاؤ کے حوالے سے حکومتوں کی ساکھ کو نقصان پہنچاتے ہیں اور فوجی عدم توازن میں اضافہ کرنے کے ساتھ ہی بین الاقوامی امن و سلامتی کو بھی خطرے میں ڈالتے ہیں۔

ص ز/ ک م  (نیوز ایجنسیاں)