پاکستان کو بھرپور جواب دیا جائے گا، نریندر مودی

بھارتی حکومت نے جمعرات 14 فروری کو نیم فوجی دستوں پر ہونے اس حملے کی ذمہ داری پاکستان پر عائد کر دی ہے۔

بھارتی وزیر اعظم نریندر مودی نے اپنے سکیورٹی مشیروں کے ساتھ ملاقات کے فوری بعد خطاب کرتے ہوئے کہا، ’’ہم ایک بھرپور جواب دیں گے، ہمارے ہمسائے کو اس بات کی اجازت نہیں دی جائے گی کہ وہ ہمیں غیر مستحکم کرے۔‘‘

بھارتی حکومت نے دعویٰ کیا ہے کہ اس کے پاس اس حملے میں پاکستان کے ملوث ہونے کے نا قابل تردید ثبوت موجود ہیں تاہم پاکستان نے اس الزام کو مسترد کرتے ہوئے کہا ہے کہ پاکستان کا اس حملے کے ساتھ کسی قسم کا کوئی تعلق نہیں ہے۔

دوسری طرف بھارت کے وزیر خزانہ ارون جیٹلی نے کہا ہے کہ بھارت تجارتی شعبے میں پاکستان کو دی جانے والی تمام رعایات ختم کر دے گا۔ جیٹلی کے مطابق نئی دہلی حکومت پاکستان کو مکمل طور پر تنہا کرنے کے لیے سفارتی سطح پر تمام تر اقدامات کرے گی۔ارون جیٹلی کے مطابق پاکستان کے خلاف کیے جانے والے اقدامات میں اسے ورلڈ ٹریڈ آرگنائزیشن کے ضوابط کے تحت پاکستان کو ’موسٹ فیورڈ نیشن‘ کے طور پر دیے جانے والی تمام مراعات کا خاتمہ شامل ہے۔

یہ پیشرفت ایک ایسے موقع پر سامنے آئی ہے جب بھارت میں عام انتخابات کو چند ہی ماہ باقی رہ گئے ہیں۔ تجزیہ کاروں کے مطابق بھارتی وزیر اعظم نریندر مودی کی قوم پرست جماعت بھارتیہ جنتا پارٹی کو ان انتخابات کے حوالے مشکلات کا سامنا ہے اور اس کے لیے ان انتخابات میں بڑی کامیابی حاصل کرنا مشکل ہو جائے گا۔

بھارتی زیر انتظام کشمیر میں ’سینٹرل ریزرو پولیس فورس‘ کے اہلکاروں کی بس پر ہونے والے اس خودکش کار بم حملے کی ذمہ داری شدت پسند گروپ جیش محمد نے قبول کی ہے۔ اس حملے کے بعد سوشل میڈیا پر بھارتی عوام کی طرف سے شدید ردعمل سامنے آ رہا ہے۔

ا ب ا / ع ا (روئٹرز، اے ایف پی)