پشاور میں سکیورٹی فورسز کی کارروائی، پانچ جنگجو ہلاک

پاکستانی پولیس کے انسداد دہشت گردی سے متعلق ادارے کے ایک سینیئر افسر طاہر خان نے بتایا کہ پشاور کے نواحی علاقے متھرا میں جمعہ 21 فروری کی شب کیے گئے ایک آپریشن کے دوران پانچ جنگجوؤں کو ہلاک کر دیا گیا۔ طاہر خان کے مطابق شدت پسندوں کے کمپاؤنڈ سے خود کش جیکٹوں سمیت دیگر نوعیت کا اسلحہ بھی برآمد ہوا ہے۔

خیبر پختونخوا پولیس کے افسر نے دعویٰ کیا کہ مارے گئے پانچوں افراد کا تعلق ایک کالعدم تنظیم سے تھا۔

پاکستان ‘گرے لسٹ‘ میں ہی رہے گا، ایف اے ٹی ایف

انسداد دہشت گردی سے متعلق پولیس کے ادارے کے ایک اور افسر محمد اجمل نے بتایا کہ جمعے اور ہفتے کی درمیانی شب ایک اور آپریشن کے دوران دو افراد کو گرفتار کر لیا گیا۔ محمد اجمل کے مطابق گرفتار کیے گئے دونوں شدت پسند پاکستانی طالبان کے سجنا گروپ کے کمانڈر تھے۔

یہ کارروائی جنوبی وزیرستان کے قریبی ضلع ٹانک میں کی گئی۔ جنوبی وزیرستان ماضی میں پاکستانی طالبان کا مضبوط گڑھ سمجھا جاتا تھا۔

پاکستان میں دہشت گردانہ حملوں میں 85 فیصد کمی

حالیہ برسوں کے دوران پاکستانی سکیورٹی فورسز نے شدت پسندوں کے خلاف متعدد آپریشن کیے ہیں۔ پاکستانی حکومت متعدد مرتبہ یہ دعویٰ بھی کر چکی ہے کہ ان علاقوں سے شدت پسندوں کا خاتمہ کر دیا گیا ہے تاہم اس کے باوجود شدت پسندوں کی کارروائیاں جاری رہی ہیں۔

تبصرہ: جرمنی کے دل پر ’نفرت کا وار‘

شمال مغربی پاکستانی علاقوں میں افغانستان کی سرحد کے قریب بسنے والے شدت پسندوں کے اکثر اوقات سرحد پار بھی روابط ہوتے ہیں اور ان کی نقل و حرکت بھی جاری رہتی ہے۔ پاکستان کے مطابق اس وجہ سے بھی سکیورٹی فورسز کو شدت پسندوں کے خلاف کارروائیوں میں بھی مشکلات کا سامنا رہتا ہے۔

پاکستانی تھنک ٹینکس کے اعداد و شمار کے مطابق گزشتہ ایک دہائی کے دوران پاکستان میں دہشت گردانہ کارروائیوں میں 85 فیصد کمی آئی ہے۔ سن 2009 میں دہشت گردی کے قریب دو ہزار واقعات پیش آئے تھے جب کہ سن 2019 کے دوران ایسے واقعات کی تعداد ڈہائی سو کے قریب رہی تھی۔

ش ح / ا ب ا (اے پی)