کابل میں لگژری ہوٹل پر حملہ، کم از کم دس افراد ہلاک

کابل سے اتوار اکیس جنوری کی صبح موصولہ نیوز ایجنسی ایسوسی ایٹڈ پریس کی رپورٹوں کے مطابق اس واقعے میں ہفتے کی رات قریب نو بجے کم از کم چار مسلح حملہ آور کابل شہر کے علاقے باغِ بالا میں ایک پہاڑی پر واقع انٹرکانٹینینٹل ہوٹل میں گھس گئے تھے۔ ان عسکریت پسندوں کی افغان سکیورٹی فورسز کے ساتھ جھڑپیں قریب 12 گھنٹے تک جاری رہیں اور آج اتوار اکیس جنوری کی صبح یہ واقعہ تمام حملہ آوروں کی ہلاکت کے ساتھ اپنے اختتام کو پہنچ گیا۔

کابل کے ايک ہوٹل پر حملہ، سکيورٹی دستوں کی کارروائی جاری

اس حملے کے فوری بعد سے لے کر کئی گھنٹے بعد تک ہوٹل میں موجود مقامی اور غیر ملکی مہمان اتنے خوفزدہ تھے کہ ان میں سے کئی افراد نے بدحواسی میں اس ہوٹل کے چوتھی اور پانچویں منزل کی کھڑکیوں کے راستے اپنی جانیں بچانے کے لیے وہاں سے فرار ہونے کی کوشش بھی کی۔

سرکاری ذرائع کے مطابق اس حملے میں سات افراد زخمی بھی ہوئے، جن میں سے تین سکیورٹی اہلکار ہیں۔ کابل میں افغان وزارت داخلہ کے ترجمان نجیب دانش نے بتایا کہ اس واقعے کے بعد ہوٹل میں موجود ڈیڑھ سو سے زائد افراد کو بحفاظت وہاں سے نکال لیا گیا، جن میں 41 غیر ملکی بھی شامل ہیں۔

افغان طالبان کا مذاکراتی وفد پاکستان میں، ’بات چیت مری میں‘

نجیب دانش نے صحافیوں کو بتایا، ’’حملہ آوروں کی تعداد چار تھی، جو تمام سکیورٹی اہلکاروں کے ہاتھوں مارے گئے۔ اس حملے میں چھ دیگر افراد بھی مارے گئے، جن میں ایک غیر ملکی خاتون بھی شامل ہے۔‘‘ مرنے والے باقی پانچ افراد بظاہر مقامی باشندے تھے، جو اس حملے کے وقت ہوٹل میں موجود تھے۔

دیگر رپورٹوں کے مطابق اس حملے کے بعد مقامی وقت کے مطابق اتوار کے روز قبل از دوپہر تک افغان سکیورٹی اہلکار اس ہوٹل کے ہر کمرے کی مکمل تلاشی لے رہے تھے تاکہ ممکنہ طور پر وہاں چھپے ہوئے کسی بھی زندہ حملہ آور کو تلاش کیا جا سکے۔

کابل میں داعش امریکی اور افغان فورسز کی ’ناک کے عین نیچے‘

افغانستان: جرمن سفارت خانہ کنٹینر میں کام شروع کرے گا

کابل کے اس ہوٹل کا لگژری ہوٹلوں کے بین الاقوامی سلسلے انٹرکانٹینینٹل سے کوئی تعلق نہیں ہے لیکن شہر کا یہ بہت مہنگا ہوٹل نہ صرف مقامی اور غیر ملکی مہمانوں میں بہت مقبول ہے بلکہ کئی سرکاری کانفرنسیں بھی یہیں ہوتی ہیں۔

ہفتہ بیس جنوری کی رات کیے گئے اس تازہ حملے سے قریب سات برس قبل 2011ء میں بھی افغان طالبان نے اس ہوٹل پر ایک بڑا خودکش بم حملہ کیا تھا، جس میں دس عام شہریوں سمیت کم از کم 21 افراد ہلاک ہو گئے تھے۔

کابل میں خودکش حملہ،کم از کم 40 ہلاک

افغان ’اسلامک اسٹیٹ‘ کی صفوں میں غیر ملکی جہادی شامل

ملکی وزارت داخلہ کے مطابق اس بارے میں چھان بین جاری ہے کہ تینوں مسلح حملہ آور سخت سکیورٹی کے باوجود اس ہوٹل میں داخل ہونے میں کیسے کامیاب ہوئے۔ حملے کے وقت اس ہوٹل میں ایک ٹیلی کمیونیکیشن کانفرنس میں شرکت کے لیے درجنوں صوبائی اہلکار بھی وہاں موجود تھے۔