کاتالان لیڈر کا اعلان، ہسپانوی حکومت کی خصوصی میٹنگ طلب

کاتالونیا کے صدر کارلیس پوج ڈیمونٹ نے منگل 10 اکتوبر کی شام اپنی علاقائی پارلیمنٹ میں تقریر کرتے ہوئے کہا کہ وہ عوام کے اُس مینڈیٹ کو قبول اور تسلیم کرتے ہیں جس میں عوام نے کاتالونیا کی آزادی کے حق میں ووٹ دیا ہے۔ اُن کی مراد پہلی اکتوبر کے آزادی ریفرنڈم میں ڈالے گئے ووٹوں کے نتائج تھے جس میں 90 فیصد سے زائد ووٹرز نے کاتالونیا کی آزادی کے حق میں ووٹ دیا تھا۔ اس ریفرنڈم کو اسپین کی مرکزی حکومت اور سپریم کورٹ نے انعقاد سے قبل ہی کالعدم قرار دے دیا تھا۔

ممکنہ آزادی کے بعد کاتالونیا کا یورپی یونین میں مستقبل

کاتالان رہنماؤں کی مذاکرات کی دعوت اسپین نے مسترد کر دی

کاتالونیا کے رہنما ’غیرذمہ داری‘ کا مظاہرہ کر رہے ہیں، ہسپانوی بادشاہ

ہسپانوی پولیس کے ’اقدامات‘ غیر منصفانہ ہیں، کاتالونیا حکومت

ہسپانوی وزیراعظم ماریانو راخوئے کا کہنا ہے کہ وہ اپنا ہر اختیار استعمال کرتے ہوئے کاتالونیا کی آزادی کو روکنے کی کوشش کریں گے۔ انہوں نے اس نیم خود مختار علاقے میں میڈرڈ حکومت کی براہ راست حکمرانی قائم کرنے کے امکان کا اشارہ بھی دیا۔ تجزیہ کاروں کے مطابق اگر راخوئے نے کاتالونیا میں ’ڈائریکٹ رُول‘ کا نفاذ کیا تو اس سے سیاسی انتشار میں اضافہ ہو گا۔ اس سلسلے میں ہسپانوی حکومت کی خصوصی بحرانی میٹنگ بھی آج بدھ گیارہ اکتوبر کو طلب کر لی گئی ہے۔

منگل دس اکتوبر کی شام کو کاتالونیا کے صدر کارلیس پوج ڈیمونٹ نے اپنے خطاب کے بعد علاقائی پارلیمنٹ کی منظور کردہ آزادی کے اعلان کی دستاویز پر دستخط کیے۔ تاہم ایک حکومتی ترجمان کے مطابق اس کی حیثیت علامتی ہے۔ پوج ڈیمونٹ جب اپنی پارلیمنٹ میں خطاب کر رہے تھے، اُس وقت علاقائی پارلیمان کی عمارت کے باہر ہزاروں افراد کاتالونیا کے جھنڈے لیے جمع تھے۔ یہ لوگ زور دار نعرے بازی بھی کر رہے تھے۔

دوسری جانب میڈرڈ حکومت کا واضح ردِ عمل سامنے نہیں آیا ہے لیکن راخوئے حکومت بار بار کہہ چکی ہے کہ آزادی کے معاملے پر کوئی مذاکرات نہیں ہوں گے۔ نیوز ایجنسی اے ایف پی کے مطابق پوج ڈیمونٹ اور اُن کے اتحادیوں نے آزادی کی دستاویز پر دستخط پارلیمنٹ چیمبر کے باہر کیے اور پھر مذاکرات کی راہ ہموار کرنے کے لیے اُسے آخری وقت پر معطل کر دیا۔

اسپین کے علاوہ کاتولونیا کے بعض سیاسی رہنماوں اور کئی یورپی ملکوں کے رہنماؤں نے بھی کاتالونیا کی اسپین سے علییحدگی اختیار کرنے کی مخالفت کی ہے۔ ملکی سیاسی رہنماؤں نے فرانکو کی آمریت کے بعد شروع ہونے والے جمہوری دور کے دوران اسپین کی موجودہ سیاسی صورت حال پر گہری تشویش کا اظہار کیا ہے۔

کاتالونیا کی آزادی کے اعلان کو کاتلان لیڈر کی جانب سے آخری وقت پر معطل کرنے پر عالمی منڈیوں پر مثبت اثرات مرتب ہوئے ہیں۔ آج بدھ گیارہ اکتوبر کو ایشیائی مالی منڈیوں میں تیزی دیکھی گئی اور یورو زون کی کرنسی یورو کی قدر میں اضافہ بھی دیکھا گیا۔