کورونا: جرمنی میں تمام عبادت گاہوں میں اجتماعی عبادت بھی منع

جرمن دارالحکومت برلن سے پیر سولہ مارچ کی شام ملنے والی نیوز ایجنسی ڈی پی اے کی رپورٹوں کے مطابق ملک میں تمام مذاہب کے عبادت خانوں میں اجتماعی عبادت کا معمول کا طریقہ کار معطل کرنے اور آئندہ فیصلے تک ممنوع قرار دینے کا فیصلہ وفاقی حکومت اور تمام صوبائی حکومتوں نے مل کر کیا ہے۔ اس سلسلے میں جرمن چانسلر میرکل آج پیر کی شام ایک پریس کانفرنس میں باقاعدہ اعلان بھی کرنے والی ہیں۔

اس فیصلے کے مطابق صرف عبادت خانوں میں اجتماعی عبادت ہی نہیں بلکہ تمام مذہبی، سماجی اور فلاحی تنظیموں کے اجلاس بھی ممنوع قرار دے دیے گئے ہیں، جبکہ بسوں کے ذرہعے طویل فاصلے کے سفر بھی اب غیر معینہ مدت کے لیے ممنوع ہوں گے۔

نیوز ایجنسی کے این اے نے کثیر الاشاعت جرمن روزنامے 'بلڈ‘ کا حوالہ دیتے ہوئے لکھا ہے کہ اس فیصلے میں درج کردہ نکات میں سے ایک نکتے میں لکھا گیا ہے، ''تمام کلیساؤں، مساجد، یہودی عبادت گاہوں اور دیگر جملہ مذاہب کے عبادت خانوں میں عبادت گزاروں کے جمع ہونے پر پابندی ہو گی۔‘‘

ساتھ ہی کھیلوں، ثقافتی شعبے اور ہوٹلنگ اور ریستورانوں کے لیے اوقات کار بھی واضح طور پر محدود کرنے کا فیصلہ کر لیا گیا ہے۔ فیصلے کے مطابق ریستورانوں کو زیادہ سے زیادہ صبح چھ بجے سے شام چھ بجے تک کھلے رہنے کی اجازت ہو گی۔

تاہم عوام کو روزمرہ کی زندگی میں کم سے کم مشکلات کا سامنا کرنا پڑے، اس امر کو یقینی بنانے کے لیے تمام سپر مارکیٹیں، میڈیکل اسٹورز، پٹرول پمپ، بینک اور ڈاک خانے وغیرہ کھلے رہیں گے۔

اس طرح پیشہ وارانہ خدمات کی فراہمی میں کوئی تعطل نہ آنے کو بھی یقینی بنایا جائے گا، جبکہ عام سٹوروں اور کاروباری اداروں کے اتوار کے روز بند رکھے جانے کی قانونی پابندی میں بھی غیر معینہ مدت کے لیے نرمی کر دی جائے گی۔

م م / ش ح (ڈی پی اے، کے این اے)