کینیا میں زہریلی شراب پینے سے 60 افراد ہلاک

کینیا کے کے ٹی این ٹیلی وژن نے ہلاکتوں کی تعداد پچاس بتائی ہے جبکہ سیٹیزن ٹی وی کے مطابق اکسٹھ افراد ہلاک ہوئے ہیں۔ انسپکٹر جنرل آف پولیس ڈیوڈ کیمائیو نے بتایا ہے کہ زہریلی شراب پینے کے نتیجے میں یہ ہلاکتیں ایمبو، کیامبو، مورانگا اور کیتوئی ریاستوں میں ہوئی ہیں۔ انہوں نے خیال ظاہر کیا ہے کہ تمام علاقوں میں متاثرہ لوگوں نے ایک ہی جگہ سے پہنچنے والی شراب پی۔

شراب اور دواؤں کے ناجائز استعمال کے خلاف قومی سطح پر سرکاری مہم کے چیئرمین جان موتوتھو نے بھی یہی خیال ظاہر کیا کہ زہریلی شراب ایک ہی مقام سے متاثرہ علاقوں میں پہنچی۔

موتوتھو نے سیٹیزن ٹی وی سے بات چیت میں کہا: ’’شراب پینے سے اندھی ہونے والی ایک خاتون نے بتایا ہے کہ انہوں نے علی الصبح پانچ بجے پینا شروع کی تھی۔ کینیا میں کسی بھی دکان کو صبح پانچ بجے شراب بیچنے کی اجازت نہیں ہے۔ اصل میں فروخت شام پانچ شروع ہو سکتی ہے۔‘‘

خبر رساں ادارے روئٹرز نے مقامی ذرائع ابلاغ اور حکام کے حوالے سے بتایا ہے کہ درجنوں افراد کو تشویشناک حالت میں ہسپتالوں میں منتقل کیا گیا ہے جبکہ متعدد اندھے ہو گئے ہیں۔

ٹیلی وژن پر نشر کیے گئے مناظر میں متعدد متاثرین کو ہسپتالوں میں درد سے لوٹتے پوٹتے دیکھا گیا۔ گیارہ ہلاکتیں کیامبو ریاست میں ہوئی۔ وہاں پولیس کمانڈر جمیز موگیرہ نے خدشہ ظاہر کیا کہ متاثرین کی تعداد زیادہ ہو سکتی ہے جن کا پتہ لگانے کی کوشش کی جا رہی ہے۔

ایمبو ریاست کے پولیس کمانڈر ولیم اوکیلو نے بتایا کہ ان کے علاقے میں کم از کم چوبیس افراد ہلاک ہوئے ہیں جبکہ 77 افراد کا علاج جاری ہے۔

کیمائیو نے بتایا کہ ہلاکتوں کا یہ سلسلہ اتوار کو شروع ہوا۔ کینیا میں دیسی ساختہ شراب عام ہے جہاں نصف سے زائد آبادی خطِ غربت سے نیچے زندگی بسر کر رہی ہے اور بیشتر لوگ مارکیٹ سے شراب خریدنے کی سکت نہیں رکھتے۔

دیسی ساختہ غیرقانونی شراب کی فروخت کے اس سلسلے کا رجحان کینیا کے قصبوں اور دیہات میں زیادہ ہے۔ سابق رکن اسمبلی جان موتوتھو کی کوششوں سے 2010ء میں شراب کے نتیجے میں پیدا ہونے والی صورتِ حال پر قابو پانے کے لیے ایک قانون بنایا گیا تھا۔ تاہم یہ قانون غیرمؤثر ثابت ہوا۔