اسرائیل کا اقوام متحدہ کے سربراہ سے استعفے کا مطالبہ

اقوام متحدہ میں اسرائیل کے سفیر گیلاد اردان نے منگل کے روز اقوام متحدہ کے سکریٹری جنرل انٹونیو گوٹیرش کے بعض بیانات سے برہم ہو کر ان سے مستعفی ہونے کا مطالبہ کیا۔

بہت ہو گیا، قطری امیر غزہ تنازعے پر برہم

اردان نے گوٹیرش پر الزام لگایا کہ اسرائیل پر حماس کے سات اکتوبر کے حملوں سے متعلق ان کے بیان سے ایسا لگتا ہے کہ جیسے انہوں نے دہشت گردی اور قتل سے متعلق افہام و تفہیم کا اظہار کیا ہو۔

امریکہ نے اسرائیل کو زمینی کارروائی میں انتظار کرنے کا مشورہ دیا ہے

واضح رہے کہ منگل کے روز اقوام متحدہ کی سلامتی کونسل سے خطاب کرتے ہوئے سکریٹری جنرل گوٹیرش نے فوری جنگ بندی کا مطالبہ کیا اور ''انسانی حقوق کے بین الاقوامی قوانین کی واضح خلاف ورزیوں کی مذمت کرتے ہوئے کہا کہ غزہ میں ہم اسی کا مشاہدہ کر رہے ہیں۔''

امریکہ کی عراق سے عملے کو نکالنے کے ساتھ ہی ملک کا سفر نہ کرنے کی ہدایت

اس موقع پر ان کا مزید کہنا تھا، ''یہ بھی تسلیم کرنا ضروری ہے کہ حماس کے حملے بس یونہی خلا میں (یعنی بلا کسی وجہ کے) نہیں ہوئے۔''  واضح رہے کہ اسرائیل، امریکہ، جرمنی اور یورپی یونین نے حماس کو ایک دہشت گرد تنظیم قرار دیا ہوا ہے۔

حماس کے زیر قبضہ یرغمالیوں کی رہائی ’بہت جلد،‘ قطری اہلکار

 سکریٹری جنرل نے اپنے خطاب میں شہریوں کو ''انسانی ڈھال'' کے طور پر استعمال کرنے اور انخلاء کے حکم کے بعد بھی جنوبی غزہ پر بمباری کرنے جیسے دونوں پہلوؤں کی بھی مذمت کی تھی۔

اسرائیلی سفارت کار ردعمل کیا رہا؟

اسرائیلی سفیر اردان نے سوشل میڈیا پلیٹ فارم ایکس (ٹویٹر) پر لکھا کہ گوٹیرش کے تبصروں کا مطلب یہ ہے کہ وہ اقوام متحدہ کی قیادت کرنے کے قابل نہیں ہیں۔

اردان نے مزید لکھا، ''میں ان سے فوری طور پر مستعفی ہونے کا مطالبہ کرتا ہوں۔ ان لوگوں سے بات کرنے کا کوئی جواز نہیں ہے، جو اسرائیل کے شہریوں اور یہودیوں کے خلاف ہونے والے انتہائی خوفناک مظالم کے لیے ہمدردی کا اظہار کرتے ہیں۔ میرے پاس کوئی الفاظ نہیں ہیں۔''

اقوام متحدہ کے سربراہ کے بیان پر اسرائیلی وزیر خارجہ ایلی کوہن نے بھی برہمی کا اظہار کیا، جنہوں نے گوٹیرش کی طرف انگلی اٹھاتے ہوئے انہیں سات اکتوبر کو قتل کیے گئے چھوٹے بچوں سمیت عام شہریوں کے بارے میں یاد دلایا۔

انہوں نے کہا، ''سکریٹری جنرل آپ کس دنیا میں رہتے ہیں؟ یقینی طور پر، یہ ہماری دنیا نہیں ہے۔'' کوہن نے اس کے بعد گوٹیرش کے ساتھ اپنی طے شدہ ملاقات بھی منسوخ کر دی۔

انہوں نے سوشل میڈیا پر لکھا، ''میں اقوام متحدہ کے سکریٹری جنرل سے ملاقات نہیں کروں گا۔ سات اکتوبر کے بعد متوازن نقطہ نظر کی کوئی گنجائش نہیں ہے۔ دہشت گرد تنظیم حماس کو دنیا کے نقشے سے مٹا دینا چاہیے۔''

عسکریت پسند تنظیم حماس کے حملہ آوروں نے سات اکتوبر کو جنوبی اسرائیل میں حملہ کیا تھا، جس میں شہری اہداف بشمول خاندانوں اور ایک میوزک فیسٹیول کو نشانہ بنایا گیا۔ اسرائیلی اعداد و شمار کے مطابق انہوں نے کم از کم 1,400 افراد کو ہلاک اور 220 سے زائد افراد کو یرغمال بنا لیا۔

اس کے رد عمل میں اسرائیل نے غزہ کے علاقے میں بمباری شروع کی، جس میں غزہ کی وزارت صحت کے فراہم کردہ تخمینوں کے مطابق اب تک پانچ ہزار 700 سے زائد فلسطینی ہلاک اور ہزاروں زخمی ہو چکے ہیں۔ فلسطینی ذرائع نے بتایا ہے کہ ہلاک ہونے والوں میں بیشتر عام شہری ہیں، جن میں بچوں اور خواتین کی بڑی تعداد شامل ہے۔ اسرائیل کی جانب سے غزہ پر بمباری جاری ہے اور پچھلے دو دن کے دوران سات سو افراد ہلاک ہو چکے ہیں۔

ص ز/ ج ا (اے پی، اے ایف پی، ڈی پی اے، روئٹرز)