ہتک عزت کیس میں گوگل کی شکست

آسٹریلیا کی وفاقی عدالت نے پیر کے روز اپنے فیصلے میں کہا کہ کامیڈین جارڈن شینکس کی طرف سے سن 2020 میں نیو ساوتھ ویلس کے اس وقت کے نائب وزیر اعظم جون باریلارو کے متعلق دو ویڈیوز پوسٹ کی گئي تھیں۔ جج اسٹیون ریئرز نے کہا کہ ان ویڈیوز میں باریلارو کی ایمانداری پر سوالات اٹھائے گئے اور ان پر کسی ثبوت کے بغیر بدعنوانی کے الزامات لگائے گئے۔ انہیں نسلی نام سے پکارا گیا، جو کہ "ہیٹ اسپیچ سے کسی بھی صورت میں کم نہیں تھا۔"

عدالت میں سماعت کے دوران جب ویڈیو دکھائی گئی جس میں جون باریلارو کو نسل پرست قرار دیا گیا تھا، تو وہ اپنے جذبات پر قابو نہ رکھ سکے اور پھوٹ پھوٹ کر رو پڑے۔ انہوں نے کہا کہ "اس سے مجھے انتہائی اذیت پہنچی ہے۔"

مذکورہ ویڈیو جارڈن شینکس نے جون باریلارو کی ملکیت والی ایک شاندار رہائش گاہ پرتیار کی تھی جسے انہوں نے ایئر بی این بی کو کرایے پر دے رکھا تھا۔

کامیڈین جارڈن شینکس نے سن2021 میں ایک معذرت نامہ جاری کرکے ان ویڈیوز کو ایڈٹ کرنے پر رضامندی ظاہر کی تھی۔ لیکن اس ویڈیو کو یو ٹیوب پر اب تک دس لاکھ سے زیادہ مرتبہ دیکھا جاچکا ہے۔

گوگل کا فی الحال کوئی ردعمل نہیں

گوگل، جس کی ملکیت میں یو ٹیو ب ہے، نے ابتدا میں اس کیس کا دفاع کیا تھا تاہم بعد میں اس نے خاموشی اختیار کرلی تھی۔ عدالت کا کہنا تھا کہ گوگل نے ایسا اس لیے کیا کیونکہ اسے کامیابی کی کوئی امید نہیں رہ گئی تھی۔

جسٹس اسٹیون ریئرز نے گوگل کو باریلارو کو سن 2020 سے ہی نقصان پہنچانے کا ذمہ دار قرار دیا، جب سیاست داں کے وکلاء نے کمپنی کو خط لکھ کر اس ہتک آمیز ویڈیو کو یو ٹیوب سے ہٹانے کا مطالبہ کیا تھا۔ جج نے اس ویڈیو کی وجہ سے جون باریلارو کو ہونے والے نقصان کی بھرپائی کا حکم دیا۔

عدالت کا کہنا تھا کہ ان ویڈیوز کی وجہ سے باریلارو کو سیاست اور اپنے عہدے سے قبل از وقت کنارہ کش ہونا پڑا۔ انہوں نے اکتوبر 2020 میں پارلیمان کی رکنیت سے استعفی دے دیا تھا۔ عدالت کا مزید کہنا تھا کہ ان ویڈیو ز نے "انہیں غیر معمولی اذیت پہنچائی۔"

گوگل نے اس فیصلے پر فی الحال کوئی تبصرہ نہیں کیا ہے۔

جارڈن شینکس نے ان ویڈیوز کے لیے باریلارو سے معافی مانگی۔

فیصلے کے بعد عدالت سے باہر باریلارو نے مقامی میڈیا سے بات چیت کرتے ہوئے کہا کہ انہیں انصاف مل گیا اور اپنے سفر کے اس اختتام پر وہ خوش ہیں۔

انہوں نے کہا کہ انہوں نے شیکنس کے ساتھ معاملہ طے کرلیا ہے وہ صرف یہی چاہتے تھے کہ شینکس اپنی حرکت کے لیے معافی مانگ لیں۔ " یہ پیسے کے لیے نہیں تھا، یہ صرف غلطی کا اعتراف کرنے اور ویڈیوز کو ہٹانے کا معاملہ تھا۔"

ج ا/ ص ز (روئٹرز، اے پی)