یو ٹیوب کی بھارت میں قدم جمانے کی کوششیں

اس مقصد کے لیے گوگل اور یو ٹیوب کی بھارت کے کئی بڑے فلم اسٹوڈیوز کے ساتھ بات چیت بھی جاری ہے تاکہ یو ٹیوب کی فلم لائبریری کو زیادہ سے زیادہ وسعت دی جا سکے۔ بھارت میں یو ٹیوب ویب سائٹ سن 2008ء میں لانچ کی گئی تھی۔

اس ویڈیو شیئرنگ ویب سائٹ کے اعلیٰ عہدیداروں کی رائے میں بالی وڈ فلموں اور کرکٹ کی بہت بڑی مارکیٹ صرف بھارت ہی میں نہیں ہے بلکہ دنیا میں کئی ایسی منڈیاں بھی ہیں، جن کو کاروباری حوالے سے ابھی تک دریافت نہیں کیا جا سکا۔

گوگل کے ایشیا بحر الکاہل کے لیے Content Partnerships کے ڈائریکٹر گوتم آنند نے ممبئی میں خبر ایجنسی روئٹرز کو بتایا کہ یو ٹیوب کو مقامی طور پر وسعت دینا ایک نظریہ ہے، جو کاروباری حوالے سے انتہائی فائدہ مند ثابت ہو سکتا ہے۔ گوتم آنند نے کہا کہ بھارت میں کئی بالی وڈ پروڈیوسر ایسے ہیں، جن کے لیے غیر روایتی منڈیوں میں مارکیٹنگ ایک بڑا مسئلہ ہے۔ لیکن اس کا بڑا منفی پہلو یہ ہے کہ یوں ایسی منڈیوں میں لوگوں کے پاس آن لائن piracy یا کاپی رائٹس کی خلاف ورزی ہی واحد راستہ رہ جاتا ہے۔

گوتم آنند کے بقول یو ٹیوب کے ساتھ اشتراک عمل سے کم از کم اس کاروبار کو قانونی شکل دی جا سکتی ہے۔ بھارت میں اس وقت یو ٹیوب کے unique یا تکنیکی حوالے سے 'منفرد‘ قرار دیے جانے والے صارفین کی تعداد 17.3 ملین ہے۔ یہ تعداد امریکہ کے بعد کسی بھی ملک میں یو ٹیوب کے ’منفرد‘ صارفین کی سب سے زیادہ تعداد ہے۔

بھارت گوگل اور یو ٹیوب کے لیے بڑی ہی پر کشش منڈی ہے۔ اس لیے بھی دنیا میں آبادی کے لحاظ سے اس دوسرے سب سے بڑے ملک میں گزشتہ برس ستمبر تک 'براڈ بینڈ‘ انٹر نیٹ کنکشن والے صارفین کی تعداد 10.3 ملین تھی۔ بھارت کی ٹیلی کوم ریگولیٹری اتھارٹی کی کوشش ہے کہ سن 2012 کے آخر تک یہ تعداد 75 ملین اور 2014ء کے آخر تک 160 ملین ہو جانی چاہیے۔

گوگل کی کوشش ہے کہ بھارت میں یو ٹیوب ویب سائٹ کے حوالے سے اس کی موجودگی میں اضافے کی جو کوششیں کی جا رہی ہیں، وہ صرف پرسنل کمپوٹرز استعمال کرنے والے صارفین تک ہی محدود نہ ہوں۔ اس کے برعکس یہی سہولت موبائل ٹیلی فون صارفین کو بھی ملنی چاہیے۔ اس لیے کہ بھارت میں موبائل ٹیلی فون استعمال کرنے والے شہریوں کی تعداد بھی 700 ملین بنتی ہے۔

یو ٹیوب صرف بالی وڈ ہی نہیں بلکہ کرکٹ کو بھی بھارت میں اپنی کامیابی کا بڑا ذریعہ بنانا چاہتی ہے۔ اس کے لیے گوتم آنند یہ مثال دیتے ہیں کہ گزشتہ برس یو ٹیوب نے بھارت میں کرکٹ کے جس ڈومیسٹک ٹورنامنٹ کو اپنی ویب سائٹ کے ذریعے دکھانے کا اہتمام کیا تھا، وہ 200 سے زائد ملکوں میں براہ راست دیکھا گیا تھا۔ اس ٹورنامنٹ کو یو ٹیوب پر دیکھنے والے صارفین کی تعداد 55 ملین رہی تھی۔

رپورٹ: عصمت جبیں

ادارت: عدنان اسحاق