یورپ: اسرائیل حماس جنگ پر تبصرہ کرنے پر مسلم فٹبالرز معطل

بدھ کے روز فرانس کی لیگ ون ٹیم نیس نے الجزائر کے بین الاقوامی فٹبال کھلاڑی یوسف اطال کو اس وقت معطل کرنے کا اعلان کیا جب انہوں نے اسرائیل اور فلسطینی گروپ حماس کے درمیان جاری جنگ سے متعلق سوشل میڈیا پر اپنی ایک پوسٹ شیئر کی۔

جرمن صدر کا فلسطين کے دورہ اور دو رياستی حل پر زور

مبینہ طور پر یوسف اطال نے فلسطینی مبلغ محمود الحسنات کی ایک ویڈیو شیئر کی تھی، جس میں انہوں نے خدا سے ''یہودیوں کے لیے سیاہ دن '' کی دعا کی تھی۔

مشرق وسطٰی کے ليے جرمن خارجہ پاليسی

حالانکہ 27 سالہ نوجوان کھلاڑی نے پوسٹ شیئر کرنے کے فوراً بعد اپنی پوسٹ ڈیلیٹ کر دی اور معذرت پیش کرتے ہوئے کہا تھا کہ وہ ''نفرت کے پیغام کی حمایت کبھی نہیں کریں گے۔'' لیکن ان کی ٹیم نے انہیں معطل کر دیا۔

جرمنی ميں يہود دشمنی اب بھی موجود ہے

نیس نے ایک بیان میں کہا کہ پوسٹ کی سنگینی کو دیکھتے ہوئے کارروائی کی گئی ہے  اور ''اس سے پہلے کہ کھیل اور قانونی حکام کی طرف سے کوئی کارروائی کی جائے، کلب خود کھلاڑی کے خلاف فوراًتادیبی کارروائی کرے گا۔''

رواں ہفتے کے آغاز میں ہی فرانسیسی پراسیکیوٹرز نے الجزائر سے تعلق رکھنے والے اس کھلاڑی کے خلاف ''دہشت گردی کو بڑھاوا دینے'' کے شبہے میں ابتدائی تفتیش بھی شروع کی تھی۔

فرانس سے یہ خبر محض ایک دن بعد آئی ہے جب جرمنی کے بنڈس لیگا کلب مینز نے ہالینڈ سے تعلق رکھنے والے اپنے ایک کھلاڑی انور الغازی کو فلسطین کی حمایت میں سوشل میڈیا پر پوسٹ کرنے کے لیے معطل کر دیا تھا۔ انور پر الزام ہے کہ انہوں نے اپنی پوسٹ میں لکھا تھا: ''دریا سے سمندر تک، فلسطین ایک دن آزاد ہو گا۔''

جرمنی کے پبلک پراسیکیوٹر کے دفتر نے حال ہی میں جرمن پریس ایجنسی کو بتایا تھا کہ وہ اب اس جملے کو ایک مجرمانہ فعل  کے طور پر دیکھتے ہیں، کیونکہ ان کے خیال میں یہ اسرائیل کے وجود کے حق سے انحراف ہے۔

جرمنی کے پبلک پراسیکیوٹر نے اس بارے میں ایک عمومی بیان توجاری کیا، تاہم انور الغازی سے تفتیش نہیں کی جا رہی ہے۔ البتہ مینز ٹیم نے پھر بھی محسوس کیا کہ اس پر کارروائی ہونی چاہیے۔

کلب نے ایک بیان میں کہا، ''الغازی نے مشرق وسطیٰ میں جاری تنازعے پر ایک ایسا موقف اختیار کیا، جسے کلب نے ناقابل قبول سمجھا ہے۔''

اس سے پہلے کلب نے کہا تھا کہ اس نے کھلاڑی سے بات کی ہے اور وہ اس حقیقت کا احترام بھی کرتا ہے کہ ''مشرق وسطی میں پیچیدہ تنازعہ'' سے متعلق مختلف نقطہ نظر موجود ہیں لیکن کلب ان کی ''پوسٹ کے مواد سے خود کو دور کر رہا ہے'' کیونکہ ''یہ کلب کی اقدار سے ہم آہنگ نہیں ہے۔'' اس کے بعدپوسٹ ڈیلیٹ کر دی گئی۔

تنازع پر فٹبال کھلاڑیوں کا سوشل میڈیا پر خیالات کا اظہار 

اطال یوسف اور الغازی ایسے پہلے کھلاڑی ہیں جن کے خلاف ان کے کلبوں نے کارروائی کی اور انہیں معطل کیا۔ لیکن جنگ کے بارے میں اظہار خیال کرنے والے وہ پہلے فٹبالر نہیں ہیں۔

اس ماہ کے شروع میں مراکش سے تعلق رکھنے والے بائرن میونخ کے کھلاڑی نوصیر مزراوی نے بھی فلسطین کی حمایت میں ایک پوسٹ شیئر کی تھی۔

اطلاعات کے مطابق جب وہ اپنی بین الاقوامی ڈیوٹی سے واپس آئیں گے تو ٹیم مزراوی سے اس معاملے پر بات کرنے والی ہے۔

ص ز/ ج ا (اے ایف پی، روئٹرز، ڈی پی اے)