یورپی برطانوی معاہدہ: صفحات بارہ سو، منظوری صرف ایک دن میں

 بہت مشکل اور طویل مذاکرات کے بعد طے پانے والی بریگزٹ ڈیل کی بارہ سو صفحات پر مشتمل دستاویز کے مندرجات پر برطانوی اراکینِ پارلیمنٹ میں آج بدھ تیس دسمبر کو بحث ہوئی جس کے بعد اراکین نے اس معاہدے کی توثیق کر دی۔

وزیر اعظم بورس جانسن کو اس پارلیمانی توثیق میں بظاہر کسی مشکل کا سامنا نہیں کرنا پڑا کیونکہ انہیں پارلیمنٹ میں واضح برتری حاصل ہے۔ دوسری جانب یورپی یونین کے اعلیٰ ترین حکام نے بریگزٹ کی تجارتی ڈیل پر بھی دستخط کر دیے ہیں۔

ڈیل پر فریقین کے دستخط

بدھ تیس دسمبر کو برسلز میں بریگزٹ کی ٹریڈ ڈیل پر یورپی کمیشن کی صدر اُرزُولا فان ڈئر لاین اور یورپی کونسل کے صدر شارل مشیل نے ایک پروقار تقریب میں دستخط کر دیے۔ اس کے بعد اس خصوصی دستاویز کو رائل ایئر فورس کے ایک خصوصی طیارے کے ذریعے لندن بھیج دیا گیا، تا کہ برطانوی وزیر اعظم بورس جانسن بھی آج ہی اس پر دستخط کر دیں۔

یہ بھی پڑھیے:یورپی یونین اور برطانیہ کے مابین تجارت، سلامتی کا معاہدہ طے پا گیا

اس دستاویز کی یورپی پارلیمنٹ کی طرف سے منظوری بھی درکار ہے لیکن سرِدست ایسا ممکن نہیں۔ تاہم اگلے ہفتوں میں پارلیمانی اجلاس میں اس کی منظوری اور توثیق کا عمل مکمل کر لیا جائے گا۔

دوست، ہمسائے اور حلیف

بدھ ہی کو برطانوی وزیراعظم بورس جانسن نے پارلیمنٹ میں بریگزٹ کی ٹریڈ ڈیل کی منظوری کے اجلاس میں پیش کردہ قرارداد کی حمایت میں تقریر کرتے ہوئے کہا کہ ان کا ملک یورپی یونین کا گرم جوش ہمسایہ، ایک بہترین دوست اور یورپی یونین کا اتحادی رہے گا۔ ان کا یہ بھی کہنا تھا کہ لندن اور برسلز ایک ساتھ مل کر اپنی اقدار اور مفادات کا تحفظ کریں گے۔ انہوں نے مزید کہا کہ بریگزٹ کے بعد برطانوی شہری اپنی پارلیمنٹ کے منظور کردہ با اختیار قوانین کے تحت زندگی بسر کریں گے۔

بریگزٹ کے مراحل مکمل

قریب ساڑھے چار سال قبل باون فیصد برطانوی عوام نے یورپی یونین سے اخراج کی حمایت ایک ریفرنڈم میں کی تھی۔ اُس وقت اس کی مخالفت میں اڑتالیس فیصد ووٹ ڈالے گئے تھے۔ برطانیہ نے یورپی یونین کے بلاک میں سن 1973 میں شمولیت اختیار کی تھی۔ تجزیہ کاروں کے مطابق ابھی تک بریگزٹ کے مکمل اثرات برطانوی عوام پر ظاہر نہیں ہوئے ہیں کیونکہ گزشتہ گیارہ ماہ کے دوران یورپی یونین کی ایک مشترکہ مارکیٹ سے بھی برطانیہ کے اخراج کے مذاکرات جاری تھے جو انجام کار سن 2020 کے آخری مہینے میں طے پا گئے۔

یہ بھی پڑھیے:بریگزٹ ڈیل کے تعلق سے سرسری طور پر اتفاق

اب نئے برس میں برطانوی عوام کو بریگزٹ کے بعد کے حالات کا سامنا ہو گا۔ یہ تبدیلی برطانیہ میں اکتیس دسمبر سن 2020 کی رات گیارہ بجے وقوع پذیر ہو گی اور اس وقت برسلز میں رات کے بارہ بج چکے ہوں گے۔

ع ح ، ب ج (اے ایف پی، اے پی)