یونان، تارکین وطن کے لیے حراستی مرکز قائم

یونان میں اتوار کے روز عام انتخابات منعقد ہونا ہیں۔ شدید اقتصادی بحران سے دوچار یونان میں جہاں ایک طرف مالیاتی ضابطے اور بچتی اقدامات انتخابات میں اہم ترین موضوعات ہیں وہیں غیر قانونی طور پر ملک میں داخل ہونے والے تارکین وطن کا معاملہ بھی انتہائی اہم ہے۔

یہ حراستی مرکز وزارت داخلہ کی جانب سے دارالحکومت ایتھنز سے 25 کلومیٹر شمال میں اچارنیس کے علاقے میں قائم کیا گیا ہے۔ تاہم مقامی سطح پر اس قید خانے کے خلاف واضح احتجاج دیکھا جا رہا ہے۔ مقامی افراد کے مطابق غیر قانونی تارکین وطن کو یہاں لانے کی وجہ سے اس علاقے میں جرائم کی تعداد بڑھے گی۔

اچارنیس کے ڈپٹی میئر کے مطابق مقامی انتظامیہ اس حراستی مرکز کی کسی اور علاقے میں منتقلی کے لیے وزارت داخلہ کے خلاف عدالت سے رجوع کر رہی ہے۔ انہوں نے کہا کہ انہیں امید ہے کہ عدالت اس بابت فوری فیصلہ کرے گی۔ انہوں نے کہا کہ اس مرکز کے قیام کے لیے تمام قانونی تقاضے پورے نہیں کیے گئے۔ مقامی ڈپٹی میئر کے مطابق اس علاقے میں پورے ایشیا اور افریقہ کے نہیں بسایا جا سکتا۔

یہ حراستی مرکز سابق پولیس ٹریننگ اسکول میں قائم کیا گیا ہے۔ اس مرکز کے قیام کے ساتھ ہی، یہاں 56 تارکین وطن کو لایا جا چکا ہے۔

واضح رہے کہ پولیس نے رواں ماہ کے آغاز میں ایتھنز میں جگہ جگہ کارروائی کرتے ہوئے ہزاروں غیر قانونی تارکین وطن کو گرفتار کیا تھا۔ ان افراد میں سے زیادہ تر وسطیٰ ایتھنز میں قائم مختلف اپارٹمنٹس سے گرفتار کیے گئے اور اب انہیں رکھنے کے لیے مختلف حراست مراکز کی ضرورت ہے۔

غیر قانونی طور پر یورپی یونین میں داخل ہونے والے زیادہ تر افراد کی پہلی منزل یونان ہی ہوتی ہے۔ حکام کے مطابق گزشتہ تین برسوں کے دوران پانچ لاکھ سے زائد افراد یونان پہنچے ہیں۔

at/ai (AFP, Reuters)